Ўзбекистон Республикаси президенти расмий ташриф билан Кувайт Давлатида бўлади
TASHKENT. Kazinform - Ўзбекистон Республикаси президенти Шавкат Мирзиёев Кувайт Давлати амири Шайх Мишъал ас-Сабоҳнинг таклифига биноан 17-18 февраль кунлари расмий ташриф билан ушбу мамлакатда бўлади, деб хабар беради Kazinform ЎР президенти матбуот хизматига таяниб.
Ташриф дастурига мувофиқ, Ал-Кувайт шаҳрида олий даражада икки томонлама музокаралар ҳамда ушбу мамлакат ҳукумати аъзолари, етакчи компаниялари ва банк-молия тузилмалари раҳбарлари билан учрашувлар бўлиб ўтади.
“Бўлажак саммит кун тартибидан Ўзбекистон-Кувайт дўстлик ва кўп қиррали шериклик муносабатларини янада ривожлантириш ва мустаҳкамлаш, савдо, инновациялар, инвестиция ва молия, "яшил" энергетика, саноат кооперацияси, қишлоқ хўжалиги, транспорт ва логистика, инфратузилма, шаҳарсозлик, соғлиқни сақлаш ва бошқа устувор йўналишларда ҳамкорликни кенгайтириш масалалари ўрин олиши кўзда тутилган”, — дейилади хабарда.
Маълум қилинишича, маданий-гуманитар ва туризм алмашинувини кенгайтириш масалалари ҳам диққат марказида бўлади. Бундан ташқари, Ўзбекистон ва Кувайт етакчилари халқаро сиёсат ва минтақавий ҳамкорликнинг долзарб жиҳатларини кўриб чиқадилар.
Музокаралар якунида қатор қўшма ҳужжатлар ва битимлар қабул қилиниши кутилмоқда.
Эслатиб ўтамиз, Шавкат Мирзиёевнинг мамлакат ёшлари билан мулоқотида Ўзбекистонда “Бир миллион дастурчи” лойиҳасига қўшимча 300 минг нафар ёш жалб этилиши маълум қилинган эди.
