Ўзбекистон миграция агентлиги Россиядаги патент имтиҳонларига тайёргарлик кўриш бўйича платформа ишга туширди

TASHKENT. Kazinform – Ўзбекистон Миграция агентлиги Россияда вақтинча ишлаш учун рухсатнома (патент) олишга тайёрловчи платформани ишга туширди, дея хабар беради Kazinform агентликнинг матбуот хизматига таяниб.

Қайд этилишича, мамлакатда патент олишнинг асосий шартларидан бири рус тили, Россия тарихи ва қонунчилигига оид тестлардан муваффақиятли ўтиш ҳисобланади. Платформа мамлакатда вақтинча меҳнат фаолиятини олиб бориш истагида бўлган фуқароларга имтиҳонларга тайёрланиш имконини беради.

Бунинг учун намунавий синов тестлари ишлаб чиқилган бўлиб, улар ёрдамида рус тили бўйича билимларни баҳолаш ҳамда имтиҳон саволлари билан танишиш мумкин. Хусусан, платформада қуйидагилар бўйича тест намуналари келтирилган:

• эшитиб тушуниш;
• ўқиш ва ёзиш;
• лексика ва грамматика;
• Россия тарихи;
• Россия қонунчилиги асослари.

Олти босқичли тестлардан ўтгач, фойдаланувчиларга тўғри жавоблар тақдим этилади. Бундан ташқари, тест натижалари асосида қайта тайёргарлик кўриш мумкин бўлади.

Платформадан ушбу ҳавола орқали бепул фойдаланиш мумкин.

Эслатиб ўтамиз, аввалроқ Ўзбекистон ва Россия ҳарбий соҳада стратегик шериклик дастурини қабул қилгани ҳақида хабар берган эдик.