Ўзбекистон KOICA билан 8,49 млн АҚШ долларига тенг лойиҳа имзоланди
TASHKENT. Kazinform - Ўзбекистон Маданий мерос агентлиги ва Корея халқаро ҳамкорлик агентлиги (KOICA) ўртасида умумий қиймати 8,49 миллион АҚШ долларига тенг йирик лойиҳани амалга ошириш бўйича келишувга эришилди, деб ёзади ЎзА.
Ҳужжатни агентлик директори Баҳодир Абдикаримов ва KOICA нинг Ўзбекистондаги ваколатхонаси директори Шин Мюн Соп имзолади.
“Ўзбекистонда маданий меросни рақамли интеграциялашган бошқаруви ва ундан фойдаланиш” деб номланган ушбу лойиҳа 2025-2028 йилларда амалга оширилади. Лойиҳани амалга оширишда Ўзбекистон Республикаси Маданий мерос агентлиги, Маданият ва санъатни ривожлантириш жамғармаси, KOICA экспертлар гуруҳи ва унинг Ўзбекистондаги ваколатхонаси иштирок этади.
Лойиҳанинг асосий мақсадлари:
- Маданий меросни бошқаришнинг ўрта ва узоқ муддатли стратегик режасини ишлаб чиқиш;
- Маданий мерос объектларининг рақамли маълумотлар базасини яратиш;
- Объектни бошқариш учун махсус платформани ишлаб чиқиш;
- Соҳа мутахассисларининг малакасини ошириш;
- Зарур замонавий ускуналар сотиб олиш;
- Маданий мерос ҳақидаги рақамли туризм учун ахборот контентини тайёрлаш.
Лойиҳанинг муваффақиятли амалга оширилиши икки давлат ўртасидаги дўстлик ва шериклик муносабатларини янада мустаҳкамлайди, маданий меросни асраб-авайлаш ва тарғиб этишда янги қадам бўлади.
Ҳужжатларни имзолаш маросимида мазкур ташаббус Ўзбекистон билан Корея ўртасидаги тарихий-маданий алоқаларни чуқурлаштиришда алоҳида аҳамият касб этиши таъкидланди.
