Туркия чет эллик профессорлар сонига янги чекловлар киритади
ASTANA. Kazinform – Туркия университетларида хорижлик ўқитувчилар сони 2 фоиздан ошмаслиги керак. Бу ҳақда AZƏRTAC агентлиги хабар берди.
Туркия университетларида шартнома асосида ишлаётган чет эл фуқаролари сони университетлардаги умумий профессор-ўқитувчиларнинг 2 фоизидан ошмаслиги керак.
Тегишли қонун лойиҳаси Туркия Буюк Миллат Мажлиси (парламенти) ялпи мажлиси кун тартибига киритилди.
Қонун лойиҳаси муаллифларининг фикрича, ушбу ўзгартиришлар Туркия олий таълим тизимида кадрлар сиёсатини янада самарали режалаштириш имконини беради.
Туркия Олий таълим кенгаши (YÖK) маълумотларига кўра, 2023-2024 ўқув йилида мамлакат университетларида 3 мингга яқин хорижлик мутахассис шартнома асосида ишлаган. Уларнинг аксарияти Эрон, Озарбайжон, АҚШ ва Сурия фуқаролари эди.
Хусусан, Туркия университетларида фаолият юритаётган 235 нафар озарбайжонлик олим ва мутахассисдан 39 нафари профессор, 13 нафари доцент унвонига эга.
