Туркистон вилоятидаги ҳар бир фахрийга 5 миллион тенгедан берилади
TÚRKІSTAN. KAZINFORM – Вилоятда 9 нафар иккинчи жаҳон уруши қатнашчиси истиқомат қилади.
Туркистон вилояти фахрийларига Ғалабанинг 80 йиллиги муносабати билан ҳокимликдан 5 миллион тенге миқдорида бир марталик моддий ёрдам беради. Иккинчи жаҳон уруши қатнашчиларига тенглаштирилган фуқароларга уларнинг тоифалари бўйича 50 минг тенгедан 120 минг тенгегача бир марталик моддий ёрдам кўрсатиш режалаштирилган. Шунингдек, мамлакатимизнинг “Фахрийлар тўғрисида”ги қонунига мувофиқ ижтимоий қўллаб-қувватлаш чоралари кўриляпти.
Бу ҳақда Туркистон вилояти ҳокими Нуралхан Кўшеров раислигида ўтказилган аппаратнинг ҳафталик йиғилишида маълум қилинди.
Йиғилишда Ғалабанинг 80 йиллигини нишонлаш бўйича ўтказиладиган тадбирлар режаси кенг муҳокама этилиб, амалга оширилиши лозим бўлган ишлар белгилаб олинди.
Вилоят бандликни мувофиқлаштириш ва ижтимоий дастурлар бошқармаси бошлиғи Асия Темирбоеванинг айтишича, чора-тадбирлар дастури нафақат байрам кунлари, балки бутун йилни қамраб олган.
Бугунги кунда Туркистон вилоятида 3 305 нафар иккинчи жаҳон уруши қатнашчиси ва уларга тенглаштирилган шахслар бор. Уларнинг 9 нафари уруш қатнашчиларидир. Улар Жетисай, Ўрдабаси, Отирар, Сарам, Сариағаш, Созақ, Қазиғурт туманлари ҳамда Кентау, Туркистон шаҳарларида истиқомат қилади.
Йиғилишда вилоят ижтимоий ривожлантириш бошқармаси бошлиғи Ерлан Кузембаев тадбир режаси ҳақида маъруза қилди. Ғалабанинг 80 йиллиги доирасида вилоятда кенг кўламли тадбирлар ўтказиш режалаштирилган. Хусусан, қаҳрамонлар номини тарғиб қилиш мақсадида турли кўрик-танловлар, экскурсиялар, илмий-амалий анжуманлар, «Жас Ұлан» ҳарбий-спорт ўйинлари, оммавий спорт тадбирлари, ҳарбий парад ўтказиш режалаштирилган.
“Соғлом Қозоғистон” ихтисослаштирилган поездининг йўлга қўйилиши доирасида фахрийлар ва фронт орти меҳнаткашлари ҳамда олис станцияларда истиқомат қилувчи аҳолининг малакали шифокорлар томонидан бепул даволаниши ташкил этиляпти.
