Трамп: Исроил Ғазо секторидаги урушни тўхтатиш бўйича келишувни қабул қилди
ASTANA. Kazinform – АҚШ президенти Дональд Трамп Исроил Ғазо секторидаги урушни тўхтатиш бўйича янгиланган 60 кунлик ярашув таклифини қабул қилганини маълум қилди, деб ёзади DW.
Унинг таъкидлашича, бу муддат ичида АҚШ барча томонлар билан ҳамкорликда урушни тугатишга ҳаракат қилади. Бу ҳақда Трамп 1 июль, душанба куни кечқурун Truth Social платформасида ёзган.
Трамп ХАМАС исломий ҳаракатини ҳам ушбу таклифни қабул қилишга қатъий чақирди.
“Мен бутун Яқин Шарқ учун умид қиламанки, ХАМАС бу келишувни қабул қилади, чунки бундан яхшироқ таклиф бўлмайди – фақат ёмонлашади”, – деди у.
Яқинда Исроил ва Эрон ўртасида 12 кун давом этган урушдан сўнг ярашувга эришилганидан кейин Трамп Исроил ва ХАМАС ўртасида 21 ойдан бери давом этаётган урушни ҳам тўхтатиш тарафдори.
DPA агентлигининг таъкидлашича, бир неча ойдан бери муҳокама қилиниб келаётган 60 кунлик ярашув бу йўлда муҳим қадам бўлади. АҚШ маълумотларига кўра, тинчликка эришиш учун фаол ҳаракат қилаётган Қатар ва Миср вакиллари энди бу “якуний таклифни” ХАМАСга етказиши керак.
ХАМАС рози бўладими?
ХАМАС янгиланган ярашув шартларини қабул қиладими-йўқми — бу ҳали аниқ эмас. Охирги таклиф ХАМАСнинг асосий талаби — ярашув урушнинг тўлиқ тугашига кафолат бўлиши керак, деган шартини ҳисобга олгани-олмагани номаълум.
“Биз исроилликларни рози қилиш учун ғоялар таклиф қилдик. Улар рози бўлишди”, – деган америкалик расмийлардан бири Axios порталига берган интервьюсида.
Трампнинг таъкидлашича, Исроил “зарур шартлар”га рози бўлган. Келаси ҳафта у Исроил бош вазири Биньямин Нетаньяхуни Вашингтонда қабул қилади. Ғазо секторидаги урушни тўхтатиш масаласида у Нетаньяхуга нисбатан қанчалик қатъий бўлишини сўрашганида Трамп: “Жуда қатъий”, – деб жавоб берган. Унинг сўзларига кўра, Нетаньяху ҳам урушни тугатишни истайди. Трамп келишувга ҳатто келаси ҳафтаёқ эришиш мумкинлигига ишонч билдирди.
Axios маълумотига кўра, исроиллик расмийлар агар музокараларда ижобий силжиш бўлмаса, Исроил Ғазо секторидаги ҳарбий операцияларини кенгайтиради, деб огоҳлантирган.
“Биз Ғазо шаҳри ва марказий ҳудудларда ҳам Рафаҳда қилганимиздек ҳаракат қиламиз. Бу биз хоҳлаган йўл эмас, лекин агар гаровдаги шахслар масаласида илгарилаш бўлмаса, бошқа илож қолмайди”, – деган Исроилнинг юқори лавозимли амалдорларидан бирига таяниб ёзади нашр.
