Трамп АҚШ-Хитой савдо музокараларида “катта силжиш” бўлганини айтди

ASTANА. Кazinform – Швейцарияда бўлиб ўтган музокаралар чоғида АҚШ ва Хитой “тўлиқ қайта юклаш” бўйича келишиб олдилар, деди АҚШ президенти Дональд Трамп. У маслаҳатлашувларнинг биринчи кунини "жуда яхши" деб атади, дея хабар беради BBC.

— Кўп нарсаларни муҳокама қилдик, кўп масалалар бўйича келишувга эришдик. Биз катта ютуқларга эришдик, — деб ёзди Трамп ўзининг Truth Social ижтимоий тармоғида, лекин гап айнан нима ҳақида эканлигини аниқламади.

АҚШ ва Хитой делегациялари шу ҳафта охирида Женевада икки кунлик музокаралар ўтказмоқда. Мақсад Трамп апрель ойи бошида бошлаган савдо урушини юмшатишдир. Унинг ташаббуси билан АҚШ Хитой товарларига божхона тарифларини кескин оширди. Бунга жавобан Пекин ҳам тарифларни оширди. Натижада солиқ ставкаси 100 фоиздан ошди, икки давлат ўртасидаги савдо амалда тўхтади.

Reuters хабарига кўра, делегацияларнинг шанба кунги учрашуви саккиз соат давом этган ва якшанба куни эрталаб давом этади. Бу савдо уруши бошланганидан бери икки давлат юқори мартабали расмийлари ўртасидаги биринчи юзма-юз учрашувдир.

Аввалроқ Трамп Оқ уйнинг “Атиргул боғи”да баёнот бериб, АҚШнинг янги тариф сиёсатини эълон қилган эди.

У дастлаб Хитойга тарифларни 125 фоизга, кейин эса 145 фоизга оширди. Ўз навбатида, Хитой АҚШ товарларига божларни 125 фоизгача оширди.

Аввал хабар қилинганидек, Хитой товарлари АҚШ божларини четлаб ўтиш учун Жанубий Корея маҳсулоти сифатида тақдим этилмоқда.