Тоқаев Туркия Республикасининг энг олий давлат мукофоти – «Devlet Nişanı» ордени билан тақдирланди
ASTANA. Kazinform – Қасим-Жомарт Тоқаев Туркия Республикасининг энг юксак давлат мукофоти – «Devlet Nişanı» ордени билан тақдирланганини улкан шараф деб баҳолади ҳамда Президент Режеп Таййиб Эрдоған ва бутун турк халқига чуқур миннатдорлик изҳор этди. Бу ҳақда Ақорда матбуот хизмати хабар берди.
“Мен миллий ёки хорижий орденлар ва бошқа мукофотларни қабул қилишдан олдин рад этганман. Аммо бугунги Сизнинг қарорингиз алоҳида маънога эга, десам муболаға бўлмайди. Бу – қардош қозоқ ва турк халқлари ўртасидаги ҳамкорлик тарихида муҳим ва мазмунли воқеа. Сиз бундан ташқари, аждодларимизнинг васиятига ва умумий меросимизга садоқатли эканингизни яна бир бор намоён этдингиз. Бу олий мукофотни мен бутун қозоқ халқининг шаънига кўрсатилган юксак ҳурмат ва эътибор деб қабул қиламан. Ушбу ташаббус – илдизи бир, дини ва дили муштарак халқларимизнинг узвий дўстлиги ва биродарлик алоқаларининг равнақ топаётганининг ёрқин ифодаси, қимматли қадриятларимизни улуғлайдиган муҳим қадам. Шу билан бирга, бу мукофот икки томонлама стратегик ҳамкорликни мустаҳкамлашга бўлган қатъий интилишимизнинг тимсолидир”, – деди ҚР Президенти.
Президент Тоқаев ҳамкасби Режеп Таййиб Эрдоғанни жаҳон миқёсидаги узоқни кўра оладиган, нуфузли ва юксак обрўли сиёсий арбоб сифатида таърифлаб, уни минтақавий ва глобал барқарорлик ҳамда хавфсизликни мустаҳкамлашга улкан ҳисса қўшаётган тарихий шахс сифатида эътироф этди.
“Оқилона сиёсатингиз ва мамлакат манфаатлари йўлидаги қатъиятли меҳнатингиз туфайли сиз бундай олий мартабага эришдингиз. Бугун Туркиянинг халқаро майдондаги нуфузи ва таъсири ҳеч кимда шубҳа уйғотмайди. Сизнинг раҳбарлигингиз остида Туркиянинг қўлга киритган ютуқлари бутун дунёда эътироф этилмоқда. Мамлакатингизнинг жаҳон ҳамжамиятидаги ўрни, муваффақиятлари ва таъсири бевосита сиз билан боғлиқ. Бугун Туркия иқтисодий жиҳатдан дунёнинг етакчи 20 мамлакатидан бири ҳисобланади. Мутахассислар Туркиянинг келажаги порлоқ эканини ва унинг халқаро таъсири ортиб боришини башорат қилмоқда. Мен Туркия сизнинг етакчилигингизда янада юксак марраларни забт этиб, янги «олтин давр»га қадам қўяди, деб ишонаман. Биз Туркия Қозоғистон мустақиллигини тан олган биринчи давлат бўлганини ҳеч қачон унутмаймиз. Бу – мустақил Қозоғистон тарихи саҳифасида абадий сақланадиган муҳим воқеа”, – деди ҚР Президенти.
