Теннесси штатида бортида 20 киши бўлган самолёт ҳалокатга учради

ASTANA. Kazinform - Якшанба куни тушдан кейин бортида 20 киши бўлган икки двигателли самолёт Теннесси аэропорти яқинида қулаб тушди, бир неча киши жароҳат олди, деб хабар беради Kazinform агентлиги мухбири ABC Newsга таяниб.

Полиция маълумотларига кўра, ҳалокат Теннесси штатининг Таллахома шаҳрида, Нэшвилдан 77 миля жануби-шарқда, маҳаллий вақт билан соат 12:30 атрофида, самолёт Таллахома аэропортидан кўтарилганидан кўп ўтмай содир бўлган.

Ҳалокатда қурбонлар бўлмаган. Самолёт бортидаги олти нафар йўловчи касалхонага ётқизилган, улардан бири оғир аҳволда. Жароҳатланганларнинг икки нафари вертолётда, тўрт нафари эса ер усти транспортида етказилган. Расмийларга кўра, самолёт бортида парашютчилар бўлган.

Ҳалокат сабабларини АҚШ Федерал авиация бошқармаси текширмоқда.

Эслатиб ўтамиз, май ойида Сан-Диего ҳудудида шахсий самолёт ҳалокатга учраган эди. Ҳодиса оқибатида икки киши ҳалок бўлди, саккиз киши жабрланди.