SpaceX 15 соатда тўрт нафар космонавтни Халқаро фазо станциясига етказди
ASTANA. Kazinform – SpaceX компанияси шанба куни тўрт нафар космонавтдан иборат янги экипажни Халқаро фазо станциясига (ХФС) муваффақиятли етказди, деб хабар беради Euronews.
Crew Dragon фазо кемаси Ер орбитасида ҳаракатланаётган ХФСга жами 15 соатда етиб борди. Учиш АҚШдаги НАСАнинг Кеннеди номидаги фазо марказидан амалга оширилди. Илгари у ёмон об-ҳаво сабабли бир кунга кечиктирилган эди.
Crew-11 миссияси таркибига НАСА астронавтлари Зена Кардман ва Майк Финке, япон фазогири Кимия Юи ҳамда россиялик Олег Платонов киради.
Капсула станцияга муваффақиятли туташганидан сўнг, Майк Финке радио орқали шундай деди:
“Салом, фазо станцияси!”
Зена Кардман ва яна бир астронавт ўтган йилги SpaceX миссиясидан чиқариб юборилган эди. Улар ўрнига Boeing Starliner фазо кемаси орқали учирилган НАСАнинг синов-учувчилари Бутч Уилмор ва Суни Уильямс ХФСда қолган эди. Boeing кемасида юз берган техник носозликлар туфайли бир ҳафталик деб режалаштирилган миссия тўққиз ойга чўзилди.
Watch Dragon and the Crew-11 astronauts dock with the @Space_Station → https://t.co/DIuBob7vs6 https://t.co/k5kYCy2Sdu
— SpaceX (@SpaceX) August 2, 2025
Финке ва Юи аввал Starliner дастурига тайёргарлик кўраётган эди, аммо бу кемада двигатель ва бошқа техник муаммолар туфайли учиш 2026 йилгача кечиктирилди. Шу боис, улар SpaceX миссиясига жалб қилинди.
Олег Платонов эса аввалроқ «Союз» кемаси экипажидан соғлиғи туфайли чиқарилган бўлган.
Шанба куни келган экипаж билан бирга ХФСда вақтинча 11 нафар фазогир бўлди. Улар совуқ ичимлик ва иссиқ таомлар билан кутиб олинди. Янги келганлар март ойидан буён станцияда бўлган тўрт фазогирни алмаштиради. Улар эса чоршанба куни Ерга қайтиши кутилмоқда.
