Санжар Ташкенбай Жаҳон кубогида олтинчи олтин медални келтирди

ASTANA. Kazinform – Астанада бўлиб ўтаётган World Boxing доирасидаги Жаҳон кубогида Санжар Ташкенбай (50 кг) чемпионликни қўлга киритди.

Финал жангда Санжар Филиппин вакили Жей Брайан Барикуатро билан рингга чиқди.

Жанг илк дақиқаларданоқ шиддатли бошланди. Ҳар икки боксчи ҳам кўпроқ зарба йўллашга интилди. Биринчи раундда Санжар устунликни қўлга киритди ва кейинги раундларда ҳам шиддатини пасайтирмади.

Учинчи раундда у рақибини нокдаунга учратди. Шу тариқа Санжар Жаҳон кубогида Қозоғистон миллий терма жамоаси ҳисобига олтинчи олтин медални қўшди.

Санжар Ташкенбай 2003 йил 1 июнь куни туғилган. У 2023 йилда жаҳон чемпиони, 2022 йилда Осиё чемпиони бўлган.