Оиланинг рақамли картаси: жорий йилда 210 мингдан ортиқ кишига давлат хизматлари кўрсатилди
ASTANА. Кazinform — 2024 йил бошидан буён Қозоғистонда оиланинг рақамли картаси (ОРК) жорий этилиши натижасида 482 400 дан ортиқ фуқарога давлат хизматларини проактив кўрсатиш учун SМS-хабар жўнатилди. Шу билан бирга, 210 минг нафар фуқаро мурожаат қилмасдан нафақа ёки тўлов олиш имкониятидан фойдаланган.
Оиланинг рақамли картаси давлат органларининг барча мавжуд ахборот тизимлари маълумотлари асосида шакллантирилади. Бугунги кунда у Қозоғистоннинг 20 миллион фуқароси ёки 6 миллиондан ортиқ оила ҳақида маълумотни ўз ичига олади.
ОРКни жорий этишдан асосий мақсад Қозоғистон фуқароларининг давлат томонидан қўллаб-қувватлаш тизимидан тенг фойдаланишини таъминлашдан иборат. Шу муносабат билан Қозоғистон Республикаси Ижтимоий кодексида Оиланинг рақамли картаси ижтимоий сиёсатнинг ўрта ва узоқ муддатли вазифалари ва йўналишларини белгилаш воситаси сифатида белгиланган. Шунингдек, ОРК фуқароларнинг ижтимоий мавқеига қараб давлат томонидан кафолатланган қўллаб-қувватлашнинг қандайдир шаклларини олиш ҳуқуқлари тўғрисидаги кундалик “электрон хабар”дир.
- Айни пайтда ОРК давлат томонидан қўллаб-қувватлаш чораларини олиш ҳуқуқига эга бўлган Қозоғистон фуқароларига ҳеч қандай аризасиз 10 турдаги нафақа ва ижтимоий тўловлар бериш имконини беради. Меҳнат қобилиятини йўқотган тақдирда тўланадиган ижтимоий нафақалар; ишини йўқотганлик учун тўланадиган ижтимоий нафақа, боқувчисини йўқотганлик учун тўланадиган ижтимоий нафақа, ногирон болани тарбиялаётган ота-оналарга (васийларга) нафақа, ногиронлик бўйича нафақа, кўп болали оилалар учун нафақа, «Алтын алқа» ва «Күміс алқа»(олтин ва кумуш медаль маъносида) билан тақдирланган оналарга бериладиган нафақа, манзилли ижтимоий ёрдам, шунингдек, дафн маросими учун бир марталик тўлов, - деб ёзади ҚР Меҳнат ва аҳолини ижтимоий ҳимоя қилиш вазирлигидан.
Шунингдек, пенсия тўловларини ОРК орқали олиш имконияти, “ватандош” мақоми берилган ёки узайтирилганда мақомнинг амал қилиш муддати тугаши, ишсиз фуқароларни иш билан таъминлаш чора-тадбирлари тўғрисида автоматик хабарномалар жорий этилди.
Давлат томонидан қўллаб-қувватлаш чора-тадбирларини олиш ҳуқуқи белгиланганида 1414 ягона алоқа марказидан потенциал олувчига SМS-хабар юборилади. Хабарни олган фуқаро унга розилиги ҳақида жавоб бериши керак. Мурожаатни расмийлаштириш ва ижтимоий нафақа ёки тўловни тайинлаш автоматик тарзда амалга оширилади, сўнгра маблағ олувчининг банк ҳисоб рақамига ўтказилади.
Фирибгарлик хавфининг олдини олиш учун 1414 ягона алоқа марказидан келган SМS-хабарларга жавоб бериш зарурлигини таъкидлаймиз.
Барча саволлар бўйича 1414 рақамидан Call-марказига мурожаат қилинг. Қўнғироқ бепул.
