Netflix илк бор сериалда визуал эффектлар учун сунъий интеллектдан фойдаланди

ASTANA. Kazinform – Америкалик стриминг хизмати Netflix ўз сериалларидан бирида илк бор генератив сунъий интеллект ёрдамида яратилган визуал эффектлардан фойдаланди, деб хабар беради BBC.

Сунъий интеллект – матнли кўрсатмалар асосида тасвирлар ва видеолар ярата оладиган технология – аргентиналик илмий-фантастик «El Eternauta» сериалининг бир саҳнасида, яъни биноларнинг ағдарилиш жараёнини яратишда қўлланилган. Бу технология суратга олиш гуруҳига ишни тезроқ ва тежамкор тарзда якунлаш имконини берган.

Генератив СИдан фойдаланиш кўнгилочар саноатда қизғин муҳокамаларга сабаб бўлмоқда. Мутахассислар муаллифлар розилигисиз яратилган контентлар ва СИ инсонлар ўрнини босиши мумкинлигидан хавотир билдирмоқда.

Бундан аввал хабар қилинганидек, жорий йилнинг иккинчи чорагида Netflix даромади ўтган йилнинг шу даврига нисбатан 16 фоизга ошган. Бу ўсишга жанубийкореялик машҳур «Кальмар ўйини» сериалининг учинчи мавсуми сабаб бўлган. Сериални ҳозиргача 122 миллион томошабин кўрган.

Эслатиб ўтамиз, сунъий интеллект 2023 йилда Голливуддаги уч ойлик иш ташлаш вақтида кўтарилган асосий масалалардан бири бўлган. У пайтда сценаристлар гильдияси СИдан фойдаланиш қоидаларини қаттиқлаштиришни талаб қилган эди.