Нетаньяху Нью-Йоркка боради, шаҳарнинг бўлажак мэри уни ҳибсга олишга ваъда берган

NEW YORK. Kazinform – Исроил Бош вазири Биньямин Нетаньяху Нью-Йоркка боришни режалаштирмоқда. АҚШ Демократик партиясидан шаҳар мэри лавозимига номзод Зохран Мамданий Халқаро жиноий суд (ХЖС) чиқарган ордерга таянган ҳолда, уни ҳибсга олишга ваъда берган, деб ёзади Anadolu.

«Мен Нью-Йоркка президент Трамп билан бирга бораман», – деди Нетаньяху Мамданийнинг баёнотига жавобан.

Дональд Трамп Исроил раҳбарини қўллаб-қувватлади. Оқ уй раҳбарига кўра, сайловда ғалаба қозониш мустақил қарорлар қабул қилиш ҳуқуқини англатмайди.

«Барибир унга пул керак бўлади. Ҳаммаси Оқ уй орқали амалга ошади. Шунинг учун у ўзини оқилона тутиши керак, акс ҳолда муаммолар пайдо бўлади», – деди Трамп.

Аввалроқ Мамданий Демократик партиянинг праймеризида ғалаба қозониб, Нью-Йорк мэрлиги учун сайловда иштирок этиши маълум бўлган эди. Сайлов 4 ноябрь куни бўлиб ўтади. Агар ғалаба қозонса, у шаҳар тарихида мусулмон эътиқодига эга ва жанубий осиёлик илк мэр бўлиши мумкин.

2024 йилдаги теледастурлардан бирида Мамданий агар мэр бўлганида, Нетаньяхуни ҳибсга олган бўлар эдим, деб айтган.

«Нью-Йорк – халқаро ҳуқуқ қадриятларини қўллаб-қувватловчи шаҳар. Эндиликда ушбу қадриятларга мос равишда ҳаракат қилиш вақти келди», – деган у.

АҚШ ХЖС аъзоси эмаслиги ҳақидаги эслатмаларга жавобан Мамданий федерал даражада етишмаётган етакчиликни маҳаллий даражада кўрсатиш муҳимлигини таъкидлаган.

Маълумот учун, май ойида Халқаро жиноий суд Исроил Бош вазири Биньямин Нетаньяху ва мамлакат мудофаа вазирига нисбатан ҳибсга олиш ордерини чиқарган эди. Улар Ғазо секторида ҳарбий жиноят содир этганликда айбланмоқда. Бироқ Исроил ва АҚШ ХЖС юрисдикциясини тан олмайди.