Microsoft капитализацияси илк бор 4 триллион доллардан ошди

ASTANA. Kazinform – 31 июль куни Microsoft корпорациясининг капитализацияси тарихда илк бор 4 триллион доллардан ошди. Бу ҳақда DW хабар берди.

Бу кўрсаткич Microsoftни дунёда капитализацияси 4 триллион доллардан ошган иккинчи оммавий компанияга айлантирди.

Компаниянинг акциялари 30 июль куни чоп этилган чораклик ҳисоботдан сўнг рекорд даражада ўсди. Ҳисоботдаги даромад кўрсаткичлари мутахассислар прогнозидан юқори бўлди. Хусусан, Microsoft Azure булут платформасига оид фаолиятдан тушган даромад кескин ўсгани қайд этилган. Шунингдек, компания сунъий интеллектни ривожлантириш учун 30 млрд доллар сармоя киритишни режалаштирганини маълум қилган.

ОАВнинг ёзишича, 31 июль куни Нью-Йорк фонд биржасида савдолар очилишида Microsoft акциялари 6,25% га кўтарилиб, ҳар бири 560 долларга етди. Бироқ кейинчалик акциялар қиймати 535 долларгача тушиб кетди. Бу эса компания капитализациясининг 3,98 триллион долларга пасайишига олиб келди.

Эслатиб ўтамиз, 9 июль куни график процессорлар ишлаб чиқарувчи америкалик Nvidia компанияси тарихда биринчи бўлиб 4 триллион долларлик чегарани бузган эди. Уч йил аввал 400 миллиард доллардан кўпроққа баҳоланган Nvidia ўтган йили Microsoftни ортда қолдириб, дунёдаги энг қиммат компанияга айланди. Компаниянинг бундай тез ўсиши сунъий интеллект ривожи ва унга бўлган талаб билан изоҳланмоқда.

Ҳозирги вақтда Nvidia капитализацияси 4,4 триллион долларга етди. Иккинчи ўринда Microsoft, учинчи ўринда эса 3,125 триллион доллар билан Apple жой олган. Рўйхатнинг тўртинчи ва бешинчи ўринларида Amazon (2,4 триллион доллар) ҳамда Googleнинг эгаси бўлган Alphabet (2,3 триллион доллар) бор. Meta компаниясининг (Facebook ва Instagramни ўз ичига олади) капитализацияси эса 1,9 триллион долларни ташкил этмоқда.