“Марказий Осиё – Италия” биринчи саммити бошланди
ASTANA. Kazinform – Астанадаги “Тауелсиздик” саройида ҚР Президенти Қасим-Жомарт Тоқаев иштирокида биринчи “Марказий Осиё – Италия” саммити бўлиб ўтмоқда.
Тадбирда Италия Вазирлар Кенгаши Раиси Жоржа Мелони, Қирғизистон Президенти Садир Жапаров, Ўзбекистон Президенти Шавкат Мирзиёев, Туркманистон Президенти Сердар Бердимуҳамедов, Тожикистон Президенти Эмомали Раҳмон каби нуфузли меҳмонлар иштирок этмоқда.
Ўтган йилнинг январь ойида Қозоғистон Президенти Қасим-Жомарт Токаев Италияга расмий ташриф билан борган эди. У ерда Давлат раҳбари Италия Президенти Сержо Маттарелла билан учрашиб, муҳим музокаралар олиб борди. Томонлар Қозоғистон ва Марказий Осиё ўртасида Европа Иттифоқи билан ҳамкорликни ривожлантириш истиқболларини муҳокама қилдилар, транспорт ва логистика соҳасида ўзаро манфаатли ҳамкорликнинг, хусусан, Транскаспий халқаро транспорт йўналишини ривожлантиришнинг катта истиқболларини таъкидладилар.
Учрашув шу йилнинг март ойида Астана шаҳрида давом этди. Италия президенти Сержо Маттарелла Қозоғистонга келди ва Қасим-Жомарт Тоқаев билан навбатдаги учрашув ўтказди.
Давлат раҳбарлари савдо, иқтисод ва маданият соҳаларида ўзаро алоқалар йўлга қўйилганини алоҳида таъкидладилар. Ҳамкорликни янада ривожлантириш истиқболлари муҳокама қилинди. Икки давлат ўртасидаги бугунги яқинликни ўша учрашувлар натижаси сифатида кўриш мумкин.
Агар рақамлар ҳақида гапирадиган бўлсак, ўтган йили Италиядан импорт миқдори 1,3 миллиард долларга баҳоланган. Кўҳна қитъадаги ҳамкор дори-дармонлар, арматура, қувурлар, насослар ва вентиляторлар, вакциналар, идишларни ювиш машиналари ва қимматбаҳо металл буюмлар савдоси билан шуғулланган.
Италияликлар Қозоғистон иқтисодиётига сармоя киритишни ҳам унутмаган. Ташқи ишлар вазирлиги маълумотларига кўра, 1992 йилдан 2022 йилгача бўлган 30 йиллик давр мобайнида Италия мамлакат иқтисодиётига 15 миллиард доллар сармоя киритган. 2005 йилдан 2024 йил декабригача эса 7,6 миллиард долларни ташкил этди. Айни пайтда мамлакатда Италиянинг 300 га яқин компанияси фаолият юритмоқда.
Бугун Президент Қасим-Жомарт Тоқаев Қозоғистонга расмий ташриф билан келган Италия Бош вазири Жоржа Мелони Ақордада кутиб олди.
Шунингдек, музокаралар якунида Қозоғистон Президенти Қасим-Жомарт Тоқаев ва Италия Вазирлар Кенгаши Раиси Жоржа Мелони стратегик шерикликни кенгайтириш бўйича Қўшма баёнот қабул қилди ва бир қатор ҳужжатларни имзолади.
