Қўшилган қиймат солиғи ставкаларини чуқур таҳлил қилиб қабул этиш керак – ҚР Президенти

ASTANA. Kazinform – Бу ҳақда Давлат раҳбари маҳаллий бизнес вакиллари билан учрашувда айтиб ўтди. ҚР Президенти “Унинг юқори чегараси тўғрисидаги қарорни Ҳукумат аниқ ҳисоб-китоблар асосида қабул қилиши керак”, деб таъкидлади.

“Ҳар қандай ислоҳот чуқур таҳлил қилиниб, жиддий олиб борилиши керак. Иқтисодиёт тармоқларининг ўзига хос хусусиятларини ҳисобга олган ҳолда турли вариантларни ишлаб чиқиш зарур.

Мен илгари қўшилган қиймат солиғи бўйича ўз фикримни билдирмаганман. Чунки расмий мартабамга кўра, ҳар бир сўзим, фикрим қатъий буйруқ сифатида қабул қилинади. Шунга қарамай, мен бу масала бўйича ўз фикрларимни билдирмоқчиман.

Қандай бўлмасин, қўшилган қиймат ставкаларини чуқур таҳлил қилиб қабул этиш керак.

Ҳукумат тўғри ҳисоб-китобларга асосланиб, малакали мутахассислар, такрор айтаман, малакали эксперт ва тадбиркорлар, албатта, депутатлар фикрини тинглаб, якуний қарорни қабул қилгани маъқул.

Бир нарса аниқки, Ҳукумат таклиф қилаётган ҳозирги ставка жуда юқори. Аниқ рақам бердингиз. Бу жамият томонидан қизғин муҳокама қилинди. Ҳатто баъзи ҳолларда кераксиз сўзлар айтилди. Бироқ, бу жамоатчилик муҳокамасига қўйилган таклиф эди.

Такрор айтаман, Ҳукуматнинг бу борадаги ишлари бизнес, жамият, тадбиркорлар, экспертлар, яъни барча томонларнинг фикрларини инобатга олган ҳолда давом этиши керак.

Бу йил аниқ қарор қабул қилиниши керак.

Буни аввал ҳам айтганман: Ҳукумат бу масалани депутатлар, экспертлар билан атрофлича муҳокама қилиши керак.

Бугун билдирилган фикрлар ҳам инобатга олинади. Давлатга энг мақбул ечим керак, яъни бир томондан тадбиркорликка тўсқинлик қилмайдиган, балки қулай шарт-шароит яратадиган самарали йўл топишимиз, иккинчи томондан эса солиқ интизомини мустаҳкамлашимиз ва бюджет даромадларини оширишимиз керак”, – деди Қасим-Жомарт Тоқаев.