ҚР Президенти Суд бошқаруви халқаро ассоциацияси (IACA) раҳбарини қабул қилди

ASTANA. Kazinform – ҚР Президенти Суд бошқаруви халқаро ассоциацияси (IACA) президенти Памела Харрисни қабул қилди.

Қасим-Жомарт Тоқаев ҳуқуқий давлат барпо этишда қонун устуворлигини таъминлаш ва суд-ҳуқуқ тизимини ислоҳ қилиш ҳал қилувчи аҳамиятга эга эканини таъкидлади.

“Қонун ва тартиб” тамойилини қарор топтиришга қаратилган жуда муҳим ислоҳотларни амалга оширдик. Биз қонун устуворлиги жамиятга босқичма-босқич кириб келиши керак, деб ҳисоблаймиз. Бу мамлакатимиз барқарорлиги ва тараққиёти учун жуда долзарб, деб ўйлайман. Шунинг учун халқаро ҳамжамият Қозоғистон ва мамлакат суд-ҳуқуқ тизими билан яқиндан ҳамкорлик қилиши керак”, – деди Президент.

Памела Харриснинг фикрича, Суд маъмурияти ва Олий суд функцияларининг ажратилиши жаҳон амалиётидаги энг самарали ечимлардан биридир.

Учрашувда адлия органлари ўртасидаги ҳамкорликни кенгайтириш, суд жараёнларида рақамли ечимлар ва сунъий интеллектдан фойдаланиш истиқболларига алоҳида эътибор қаратилди.