ҚР Президенти Руанда Президенти билан кенгайтирилган таркибда музокаралар ўтказди

ASTANA. Kazinform – Давлат раҳбари Руанда Президенти Поль Кагаменинг 2015 йилда Қозоғистонга ташрифидан буён икки давлат ўртасидаги ўзаро ҳурмат, ҳамкорлик ва барқарор ривожланишга асосланган муносабатлар сезиларли муваффақиятларга эришганини таъкидлади. Бу ҳақда Ақорда матбуот хизмати хабар берди.

ҚР Президенти Қозоғистон Африка давлатлари билан алоқаларни кенгайтиришга алоҳида аҳамият бераётганига эътибор қаратди.

"Сизнинг истиқболли раҳбарлигингиз остида Руанда институционал барқарорлик ва истиқболли инновациялар намунасини кўрсатиб, ривожланиш йўлига ўтди. Мамлакатингизда иқтисодий ўсиш 8 фоиздан ошди. Бу модернизациянинг ёрқин намунасидир. Шу муносабат билан биз мамлакатингиз билан ҳамкорликни ривожлантиришга алоҳида аҳамият берамиз. Қозоғистон аниқ лойиҳалар орқали икки томонлама самарали муносабатларни ривожлантиришга тайёр. Ташрифингиз чоғида эришилган келишувлар Қозоғистон ва Руанда ўртасидаги муносабатларни янги босқичга кўтаришига ишонаман”, – деди Қасим-Жомарт Тоқаев.

Поль Кагаме кўрсатилган ҳурмат учун миннатдорлик билдирди ва Қозоғистоннинг икки томонлама ҳамкорликни ривожлантириш борасидаги саъй-ҳаракатларини юқори баҳолади. Шунингдек, у Руанда ва Қозоғистон ўртасидаги шериклик салоҳиятига тўхталиб, ҳар икки давлат фаровонлиги ва стратегик мулоқотни мустаҳкамлашга ҳисса қўшадиган қўшма лойиҳаларни амалга оширишга тайёрлигини билдирди.

“Астанага иккинчи марта келганимдан хурсандман. Қозоғистон ўзининг миллий тараққиётида салмоқли муваффақиятларга эришди ва бунинг шарофати билан унинг халқаро майдондаги роли ортиб бормоқда. Сиз ва мамлакатингиз билан ҳамкор ва дўст бўлганимиздан миннатдормиз”, – деди Руанда Президенти.

Давлат раҳбарлари савдо, сармоя, транспорт, қишлоқ хўжалиги, ахборот технологиялари, электрон ҳукумат ва молиявий алоқалар каби икки томонлама ҳамкорликнинг устувор йўналишларини ривожлантиришга келишиб олдилар.