ҚР Президенти Интимақ қишлоғидаги умумтаълим мактаби ўқувчилари билан суҳбатлашди
ASTANA. Kazinform – Президент Қасим-Жомарт Тоқаев Талдиқорған яқинидаги Интимақ қишлоғида жорий йилда қурилган 30-мактабга ташриф буюрди, деб хабар беради Ақорда.
1200 ўқувчига мўлжалланган мазкур таълим муассасаси маҳаллий бюджет ва Таълим инфратузилмасини қўллаб-қувватлаш республика жамғармаси маблағлари ҳисобидан барпо этилди.
Замонавий жиҳозлар билан жиҳозланган мактабда 77 ўқув хонаси, мультимедиа кабинетлари, спорт заллари, анжуманлар зали ва кутубхоналар, ёғочга ишлов бериш, металлга ишлов бериш, тикувчилик устахоналари мавжуд.
Президент таълим муассасасини кўздан кечирди, ўқувчилар билан суҳбатлашди. Давлат раҳбари таълим муассасасига мактаб автобуси совға қилди.
Жорий йилда вилоятда жами 3 та янги мактаб фойдаланишга топширилган бўлса, улардан иккитаси “Қулай мактаб” миллий лойиҳаси доирасида қурилди. Жумладан, Панфилов туманидаги Жаркент шаҳрида 1200 ўринли мактаб, Кўксу тумани Қаратал қишлоғида кичик ҳажмдаги мактаб фойдаланишга топширилди. Айни пайтда вилоятда 5 та мактаб қурилиши давом этмоқда.
