ҚР Президенти АҚШ Конгресси Вакиллар палатаси аъзоси Кэрол Миллерни қабул қилди
ASTANA. Kazinform – Қасим-Жомарт Тоқаев ушбу учрашув икки давлат ўртасидаги ҳамкорликка янги суръат бағишлаш нуқтаи назаридан муҳимлигига эътибор қаратди. Президентнинг сўзларига кўра, АҚШ Қозоғистон мустақилликка эришганидан бери ишончли ҳамкор бўлиб келган.
Қозоғистон Президенти минтақавий ва халқаро хавфсизликни таъминлаш, ядро қуролини тарқатмаслик каби муҳим соҳаларда, шунингдек, савдо-иқтисодий ва сармоявий ҳамкорликда қўшма муваффақиятларни қайд этди. Давлат раҳбарининг таъкидлашича, икки давлат ўртасидаги товар айирбошлаш изчил ўсиб, 4 миллиард доллардан ошди.
Кэрол Миллер Қозоғистон Президентига кўрсатилган шараф учун миннатдорлик билдириб, АҚШ самарали мулоқотни давом эттиришдан манфаатдор эканини таъкидлади.
Суҳбат чоғида икки томонлама муносабатларнинг асосий масалалари муҳокама қилинди. Энергетика ва инфратузилма лойиҳаларини амалга ошириш, рақамли технологиялар ва сунъий интеллектни ривожлантириш, шунингдек, давлатлар ўртасидаги транспорт-логистика алоқаларини кенгайтиришга алоҳида эътибор қаратилди.
Бундан ташқари, Қасим-Жомарт Тоқаев ва Кэрол Миллер минтақавий ва халқаро кун тартибидаги долзарб масалалар юзасидан фикр алмашдилар.
Эслатиб ўтамиз, ҚР Президенти фармойиши билан Қозоғистон халқи Ассамблеясининг навбатдаги сессияси чақирилди.
