Қозоғистонлик спортчилар Германиядаги ёзги Универсиадани саккизта медаль билан якунлади
ASTANA. Kazinform – Германияда XXXII ёзги Универсиада ўз ниҳоясига етди. Қизиқарли кечган мусобақада қозоғистонлик таэквондочилар алоҳида ажралиб турди. Бу ҳақда ҚР МОҚ хабар берди.
Мусобақада қозоғистонликлар жами саккизта медалга эга бўлди. Қозоғистон терма жамоаси таркибидаги ягона олтин медални Самирхон Абабакиров қўлга киритди. Шу тариқа, Қозоғистон ўз тарихидаги энг яхши натижани қайд этди.
Таэквондо бўйича баҳслар 17-23 июль кунлари Германиянинг Эссен шаҳрида бўлиб ўтди. Бу спорт тури бўйича умумий ҳисобда 24 та медаль тўплами (эркаклар, аёллар ва жамоавий, аралаш жамоавий баҳслар) учун кураш олиб борилди.
Қозоғистон терма жамоаси мусобақанинг илк кунлариданоқ омадли иштирок этди ва натижада саккизта медалга эга чиқди: биттаси олтин, қолган тўрттаси шахсий ва иккитаси жамоавий бронза медали бўлди.
Шахсий рақобатда бронза медали соҳиблари:
Дамир Шуленов (–68 кг),
Нодира Ахмедова (–49 кг),
Тамирлан Тилеулес (–58 кг),
Ботирхан Тўлеуғали (–80 кг),
Бейбарис Қаблан (+87 кг).
Аёллар терма жамоаси ярим финалгача етиб бориб, жамоавий баҳсларда бронза медалига сазовор бўлди. Шунингдек, аралаш жамоавий беллашувда ҳам қозоғистонликлар учинчи ўринни эгаллади.
Ягона олтин медаль эгаси – Самирхон Абабакиров
63 килограммгача бўлган вазн тоифасида иштирок этган Самирхон финалгача етиб бориб, туркиялик рақибини мағлуб этди. Мусобақадан сўнг у Olympic.kz сайтига берган интервьюсида тайёргарлик жараёни ва келгуси режалари ҳақида сўзлаб берди.
“2024 йилги Олимпиададан сўнг шахсий мураббийим Нурсултан Мамаев билан биргаликда тайёргарликни бошладим. Машғулотлар яхши ўтди. Олдинги хатоларни таҳлил қилиб, шу йўналишда ишладик”, – деди Самирхон.
Турнирларга нега қатнашмагани ҳақида:
“Универсиада олдидан жароҳат туфайли турнирларга қатнашолмадим. Машғулот йиғинларига ҳам бора олмадим. Шунга қарамай, жароҳатимни тўлиқ даволаб, мураббийим билан режали тайёргарлик олиб бордик. Ҳозирча барчаси яхши. Бироз муолажа олиб, кейин яна машғулотларни бошлайман”, — дея қўшимча қилди у.
Келгуси мақсадлар — жаҳон чемпионати ва Олимпиада
Энди терма жамоа олдидаги энг муҳим мусобақа — Хитойда бўлиб ўтадиган жаҳон чемпионати. Универсиада ғолиби бўлган Самирхон Абабакиров ўз формаси ва келгуси режалари ҳақида шундай дейди:
“2024 йилги Олимпиада билан солиштирганда, ҳозир ўзимга бўлган ишончим ошди. Спорт формам энг юқори даражада, десам бўлади. Асосий мақсад — Хитойдаги жаҳон чемпионатида ғолиб чиқиш. Шунингдек, 2028 йилги Олимпиадада Қозоғистонга тарихий олтин медални тақдим этиш”, — дея сўзини якунлади Самирхон Абабакиров.
