Қозоғистонлик Мария Бровкова Осиё ўйинларининг бронза медали соҳибига айланди

Қозоғистонлик 18 ёшли Мария Бровкова Хитойнинг Ханчжоу шаҳрида бўлиб ўтаётган Осиё ўйинларида бронза медалини қўлга киритди, деб хабар беради Каzinform мухбири.

Мария Бровкова бир кишилик каноэда 200 метрга эшкак эшишда марра чизиғини учинчи ўрин билан кесиб ўтди. Хитойлик спортчи чемпион бўлган бўлса, таиландлик эшкак эшувчи иккинчи бўлди.

Бу ғарбий қозоғистонлик Мария Бровкованинг Осиё ўйинларидаги иккинчи совринидир. Кеча у Руфина Искакова билан каноэда 500 метрга эшкак эшиш баҳсларида кумуш медални қўлга киритди.

М. Бровкованинг шахсий мураббийи, онаси Елена Бровкованинг айтишича, ушбу Осиё ўйинларида эшкак эшиш бўйича Олимпиада йўлланмалари тарқатилмайди. Келгуси йил баҳорда лицензион Осиё чемпионати бўлиб ўтади.

Мария Бровкова байдарка ва каноэда эшкак эшиш бўйича халқаро тоифадаги спорт устаси. Ёшлар ўртасида икки карра жаҳон чемпиони, катталар ўртасида жаҳон кубоги ғолиби. Айни пайтда М.Бровкова Жангирхон номидаги Ғарбий Қозоғистон аграр-техника университетининг 2-курсида жисмоний тарбия ва спорт факультетида таҳсил олмоқда. Мария келажакда онаси каби мураббий бўлишни режалаштирган, унинг орзуси миллий терма жамоа таркибида Париж Олимпиадасига йўлланмани қўлга киритиш ва тўрт йилликнинг асосий мусобақасида совринли ўринларга эга бўлиш.

Эслатиб ўтамиз, аввалроқ Қозоғистон тўртинчи олтин медални қўлга киритгани ҳақида хабар берган эдик.

Муаллиф: Айдар Оспаналиев