Қозоғистонда Янги йил арчаларининг нархи қанча
ASTANA. Kazinform - Қозоғистонликлар Янги йил байрамига ҳозирлик кўрмоқда. Кazinform мухбири мамлакатдаги арча нархларига эътибор қаратди.
Маълумки, Янги йил арафасида табиий ва сунъий арчаларга талаб ортиб, нархлар ҳам ошади. Бозордаги энг паст нархларни солиштирдик.
Табиий арча
Энг арзон табиий арча Петропавлда бўлиб чиқди. У ерда нархлар 3 минг тенгедан бошланади. Вилоят Россия Федерациясига яқин бўлганлиги сабабли, нархлар мос равишда паст. Айни пайтда вилоятга арчалар ушбу мамлакатдан олиб келинмоқда.
Иккинчи ўринда Қостанай ва Орал шаҳарлари жойлашган. У ерда жонли арча 4500 тенгедан сотилмоқда. Кўкшетау, Атирау ва Павлодарда нархлар олдинги вилоятларга нисбатан 500 тенгега қимматроқ. Янги йил яқинлашар экан, 5000 тенгедан арзон байрам арчаларини топа олмайсиз.
Шуни таъкидлаш керакки, арча нархи унинг гўзаллигига боғлиқ. Арча қанчалик узун ва қалинроқ бўлса, унинг сифатига қараб қимматроқ бўлади. Алматида 5500 тенгега ўрта тоифадаги арча сотиб олиш мумкин. Астанада арча нархи 6000 тенгедан бошланади.
Шу билан бирга, арчалар Қарағандида ҳам сотилмоқда. У ерда нархлар 7 минг тенгедан бошланади. Жезқазғанда 7500 тенгега арча сотиб олиш мумкин.
Ақтау, Қизилўрда, Семей, Ўскемен ва Чимкент шаҳарларида табиий арча нархи 20 минг тенгедан бошланади. Чимкентда арчалар илдизи билан махсус тупроқда сотилади. Байрам учун махсус кесилгани эса 20 декабрдан бозорга чиқарилади.
Мамлакатдаги энг қиммат табиий арча эса Тараз шаҳрида бўлиб чиқди. У ерда нархлар 30 000 тенгедан бошланади. Талдиқорған, Ақтўбе ва Туркистонда арча топиш мутлақо мумкин эмас. Бозорлар ва савдо жойлари яқинида топилмади.
Эслатиб ўтамиз, аввалроқ Каzinform макарон, нон, колбаса, пишлоқ ва бошқа озиқ-овқат маҳсулотлари нархини аниқлаган эди.
