Қозоғистонда робот суд ижрочилари томонидан ундириладиган сумма 40 БҲМга ошади

ASTANA. Kazinform – ҚР Адлия вазири Ерлан Сарсембаев Ҳукумат йиғилишида рақамли технологиялар орқали суд қарорларини ижро этиш бўйича ишлар кўлами кенгайтирилишини айтди.

“Жамоатчилик томонидан тез-тез танқид қилинадиган долзарб мавзу бу мажбурий равишда бажартириш масаласидир. 2024 йилда 89 мингта шикоят келиб тушган. Шу билан бирга, биз сунъий интеллект имкониятларидан янада фойдаланамиз. Робот суд ижрочиси орқали соддалаштирилган иш юритишни янада ривожлантириш давом эттирилади. Робот орқали йиғим ҳажмини йигирма ойлик ҳисоб-китоб кўрсаткичидан қирқтага (157 280 тенге) оширишни режалаштирганмиз. Бу фуқароларнинг пулларини тежайди.

Биз “Рақамли ёрдамчи”ни жорий этиш орқали “Қарздор ва қарздорнинг шахсий ҳисоби”ни такомиллаштирмоқдамиз. Ёрдамчи ишнинг боришини тўлиқ намойиш этади. Хусусан, суд ижрочи кўрган ва кўриши керак бўлган чораларни кўрсатади”, – деди у.

Айтилишича, эндиликда фуқаролар ушбу платформа орқали суд ижрочиларининг хатти-ҳаракатларидан шикоят қилишлари мумкин.

“Мол-мулк тақиқини бекор қилиш, мамлакатдан чиқишга қўйилган вақтинчалик чекловларни олиб ташлаш, қарздорларни реестрдан чиқаришни автоматлаштириш орқали ҳал этиш кўзда тутилган”, – деди Ерлан Сарсембаев.