Қозоғистонда маиший техника, мебель ва қоғоз ишлаб чиқариш кўпайган

ASTANA. Kazinform – Жорий йилнинг 11 ойида Қозоғистонда ишлаб чиқариш саноатининг асосий тармоқларида 5,3 фоиз ўсиш кузатилди. Ушбу кўрсаткич металлургия саноати, машинасозлик, кимё, тайёр металл буюмлари ва мебель ишлаб чиқариш ҳисобига таъминланди.

ҚР Саноат ва қурилиш вазири ўринбосари Олжас Сапарбековнинг сўзларига кўра, металлургия саноати 2016 йилдан бери биринчи марта 7,2 фоизга ўсган. Бунга “Qarmet” компаниясининг тўлиқ қувватли фаолиятини тиклаш, шунингдек «Қазхром», «Қазақмис», «ЕвразКаспианСталь», “Ақтўбе рельс-оралиқ заводи” каби қатор йирик корхоналарнинг ишлаб чиқариш ҳажмининг ошиши ҳисса қўшди.

“Рангли металлургия тармоғи мис ишлаб чиқариш 13,3 фоиз, рух 0,8 фоиз, алюминий ишлаб чиқариш 1,5 фоизга ўсиши ҳисобига 4,8 фоизга ўсди. Машинасозлик соҳасида қишлоқ хўжалиги машинасозлиги 15,4 фоизга, темир йўл транспорти 1,6 баробарга, электр жиҳозлари 8,1 фоизга, электрон-оптик ускуналар ва компьютерлар ишлаб чиқариш 1,7 баробарга ошди. Янги тармоқларнинг ишга туширилиши ҳисобига маиший техника ишлаб чиқариш 4,4 баробар ошди”, – деди Олжас Сапарбеков.

Кимё саноатида сульфат кислотани 20 фоизга, сариқ фосфорни 13,2 фоизга, полипропилен ишлаб чиқаришнинг режалаштирилган лойиҳа қувватини 49 фоизга ошириш ҳисобига маҳсулот ишлаб чиқариш ҳажми 8,4 фоизга ошди.

Шунингдек, тайёр металл буюмлар ишлаб чиқариш 29,5 фоизга, мебель ишлаб чиқариш 12,8 фоизга, қоғоз ишлаб чиқариш 10,2 фоизга ўсди ва ижобий динамикани кўрсатди. Ушбу тармоқларнинг умумий жами ўсиши енгил саноат, қурилиш материаллари ишлаб чиқариш каби улуши паст бўлган тармоқларнинг қисқариши статистикасини қамраб олади.