Қозоғистонда «Еңбек сіңірген геолог» мукофотига давлат мақоми берилади

ASTANA. Kazinform – «Еңбек сіңірген геолог» идоравий мукофотига давлат мақоми берилади. Бу ҳақда ҚР Ҳукумати йиғилишида Саноат ва қурилиш вазири Қанат Шарлапаев маълум қилди.

“Геолог касбини улуғлаш борасидаги ишлар қизғин олиб борилмоқда. «Еңбек сіңірген геолог» мукофотини давлат мукофоти мақомига кўтариш режалаштирилган. Бугун қонунчиликка ўзгартиришлар ишлаб чиқилмоқда», – деди вазир.

Қанат Шарлапаевнинг сўзларига кўра, геология мутахассислиги бўйича битирувчилар сони кўпайган. 2022 йилда атиги 1224 нафар, 2024 йилда эса уч мингдан ортиқ мутахассис битирган.

«Шу билан бирга, Сатбаев университети маълумотларига кўра, битирувчиларнинг 98 фоизи ўз касби бўйича ишга жойлашишини таъкидлаш лозим. Айни пайтда талабаларни геология соҳасига яқинлаштириш мақсадида “Ёш геолог” жамоат фонди ташкил этилди. Ҳар йили мазкур жамғарма томонидан ўтказиладиган “Ёш геолог” олимпиадасида 5 та давлатдан ўқувчилар қатнашади. Иш натижаларидан бири сифатида қозоғистонлик талабалар халқаро геологлар олимпиадасида совринли ўринларни қўлга киритди. Шу тариқа соҳада инсон капиталини ривожлантириш борасида тизимли ишлар амалга оширилмоқда», – деди у.