Қозоғистонда “Астиқ – 2025” халқаро конференцияси бўлиб ўтади
ASTANA. Kazinform – 2025/2026 йилги янги ғалла мавсуми арафасида Қостанай вилоятидаги етакчи қишлоқ хўжалиги тузилмаларидан бирининг далаларида “Астиқ – 2025” халқаро ғалла конференцияси бўлиб ўтади.
ҚР Қишлоқ хўжалиги вазирлигидан маълум қилишларича, мазкур тадбирда илк бор ғалла, дуккакли ва ёғли ўсимликлар етиштиришга ихтисослашган 500 дан ортиқ қишлоқ хўжалиги ишлаб чиқарувчилари, шунингдек, қишлоқ хўжалиги маҳсулотларини қайта ишлаш ва сотиш билан шуғулланувчи корхоналар иштирок этади.
Конференция 31 июлдан 1 августга қадар бўлиб ўтадиган «Jańa Dala / Qarqyn 2025» халқаро қишлоқ хўжалиги кўргазма-намойиши доирасида “Восток-1” МЧЖ ва “Агрофирма Қарқин” МЧЖ кўргазмали майдонларида бўлиб ўтади.
Иштирокчилар орасида Қозоғистон ва хорижнинг етакчи қишлоқ хўжалиги ишлаб чиқарувчилари, Ўзбекистон «Ўзёғмойсаноат» ёғ-мой саноати корхоналари уюшмаси вакиллари ҳам бўлади.
“Конференциянинг асосий қадрияти шундаки, унда биринчи марта ғалла бозорининг асосий иштирокчилари, яъни соҳанинг ўзига хос қоидаларини шакллантирувчилар йиғилади. Мазкур тадбир Қозоғистон ва Ўзбекистон ўртасидаги ишбилармонлик алоқаларини мустаҳкамлайди ва янги ҳамкорликка туртки беради”, – деди EXPO TIME компанияси ташкилотчиси директори Адилхан Сағимбаев.
Конференциянинг асосий хусусияти унинг ўзига хос форматидир: барча инфратузилма – конференция залларидан тортиб павильонлар ва овқатланиш жойларигача – тўғридан-тўғри далаларда, ишлаб чиқариш шароитларига имкон қадар яқин муҳитда жойлаштирилади.
Бу авваллари асосан йирик шаҳарлардаги меҳмонхоналарда ўтказиладиган фермерларнинг иш учрашувлари учун янги модель бўлади.
“Астиқ – 2025” иштирокчилари дон савдосидаги долзарб тенденцияларни муҳокама қилишлари, ишлаб чиқариш ва қайта ишлашнинг илғор технологияларини ўрганишлари, бошқа мамлакатлардаги ҳамкасблари билан тажриба алмашишлари мумкин бўлади.
