Қозоғистон ва Хитой тинч ядровий энергия соҳасида ҳамкорликни кучайтирмоқда

ASTANA.Kazinform - Астанада Қозоғистон Атом энергияси агентлиги раиси Алмасадам Сатқалиев ва Хитой Экология ва атроф-муҳитни муҳофаза қилиш вазири ўринбосари, Ядро хавфсизлиги миллий бошқармаси раҳбари Дон Баотун ўртасида музокаралар бўлиб ўтди, деб хабар беради Kazinform.

Томонлар икки давлат назорат органларининг амалий ҳамкорлиги истиқболларини муҳокама қилдилар. Қозоғистон лицензиялаш, назорат қилиш, техник экспертиза ва радиоактив чиқиндилар билан ишлаш бўйича тажриба алмашишдан манфаатдорлигини билдирди.

Алмасадам Сатқалиев Хитой томонини Атом энергияси агентлигини шакллантириш якунлангани ҳамда атом саноатида хавфсизлик учун масъул бўлган янги орган – Ядро бошқарув ва назорат қўмитаси ташкил этилгани ҳақида маълум қилди. Унинг қайд этишича, Қозоғистон тартибга солиш, экологик барқарорлик ва ядро хавфсизлиги соҳасида халқаро стандартлар ва илғор тажрибаларни жорий этишга эътибор қаратмоқда.

Хитой томонининг Қозоғистонда атом электр станциясини қуриш лойиҳасида иштирок этиши, ядровий ёқилғи айланишини ривожлантириш, илмий-техникавий инфратузилмани мустаҳкамлаш масалаларига алоҳида эътибор қаратилди.

Қозоғистон томони, шунингдек, лойиҳани амалга оширишнинг барча босқичларида ядро ва сув-экологик хавфсизлигини таъминлаш бўйича Хитой тажрибасини ўрганишга қизиқиш билдирди.

Қайд этилишича, атом электр станциясини қуришга тайёргарлик кўриш доирасида потенциал технология етказиб берувчиларининг қисқа рўйхати шакллантирилган бўлиб, унга етакчи жаҳон корпорациялари, жумладан, Хитойнинг HPR-1000 реактор технологиясига эга CNNC ҳам киради. Ҳамкор танлаш бўйича якуний қарор шу йил кутилмоқда.