Қозоғистон Словениянинг фармацевтика компанияси билан қўшма корхона ташкил қилиши мумкин

ASTANA. Kazinform – Астана шаҳрида Қозоғистон-Словения бизнес-форуми бўлиб ўтмоқда. Kazakh Invest миллий компанияси директорлар кенгаши раиси ўринбосари Мадияр Султанбек ушбу форум мамлакат иқтисодиётига нима олиб келиши ҳақида гапирди.

“Бугунги бизнес-форум Словения Республикаси Президентининг Қозоғистонга биринчи расмий ташрифи доирасида ўтказилмоқда. Ҳурматли меҳмон ўзи билан мамлакатининг ўнлаб етакчи ишбилармонларидан иборат бизнес делегациясини олиб келди.

Уларнинг аксарияти Словения компанияларининг биринчи менежерлари, бош директорлари ва директорлар кенгашлари аъзоларидир.

Словения бизнес вакиллари асосан фармацевтика каби соҳаларда ишлайди. Словениядаги энг йирик компаниялардан бири бу Krka. Мамлакатимизда фармацевтлар орасида ҳам жуда машҳур.

Ҳозирда компаниянинг мамлакатимиздаги ваколатхоналари фақат савдо ҳамкори сифатида фаолият юритмоқда. Қозоғистон фармацевтика компаниялари ушбу корхона билан ҳамкорликда ишлаб чиқаришни йўлга қўйиш ниятида. Бу масала форум доирасида ҳам муҳокама қилинади", – дейди Kazakh Invest раҳбари ўринбосари.

Словения президентига ҳамроҳлик қилаётган делегация таркибида IT ва телекоммуникация соҳаси вакиллари ҳам бор.

“Бозоримизда Словениянинг бир қанча компаниялари фаолият юритмоқда. Биз юқори малакали, нисбатан арзон Словения компаниялари билан ҳамкорликни мустаҳкамлашга умид қиламиз.

Энергетика соҳаси вакиллари билан қайта тикланадиган энергия лойиҳаларини муҳокама қилиш режалаштирилган. Делегация таркибида қурилиш соҳаси вакиллари ҳам бор”, – деди Мадияр Султанбек.

Айни пайтда Қозоғистон ва Словения ўртасидаги товар айирбошлаш ҳажми 100 миллион долларни, Словениянинг Қозоғистонга киритган сармоялари ҳажми эса 200 миллион доллардан бир оз кўпроқни ташкил этади.

“Бу ҳар икки давлат салоҳиятининг чўққиси эмас, албатта.

Форум доирасида икки томонлама В2В ташкил этилади. Ушбу учрашувлар “Атамекен” миллий тадбиркорлар палатаси ва тегишли давлат органлари томонидан қўллаб-қувватланади”, – деди Kazakh Invest вакили.

Мадияр Султанбекнинг сўзларига кўра, Ғарбий Европа ва Қозоғистон ўртасидаги транспорт алоқаларини тўққиз йўналиш туташган жойда жойлашган Словения салоҳияти орқали янада самаралироқ қилиш мумкин.

“Ўйлайманки, Қозоғистон ва Словения учун ўзаро манфаатли юк ташиш тарифларини белгилаш унчалик қийин бўлмаслиги керак. Бугунги форум якунлари бўйича бир қанча тижорат меморандумлари ва шартномалар имзолашни режалаштирганмиз. Бу келишувларнинг умумий миқдорини ҳозирча айтиш қийин. Чунки форум доирасида бу музокараларнинг якуний босқичи давом этмоқда”, – деди у.

Эслатиб ўтамиз, куни кеча Словения Президенти Наташа Пирц-Мусар Қозоғистонга расмий ташриф билан келган ва музокаралар якунлари бўйича қатор ҳужжатлар имзоланган эди.