Қозоғистон 2025 йилда Германияга нефть етказиб бериш ҳажмини оширмоқчи

ASTANA. Kazinform – Қозоғистон 2025 йилда Германияга нефть етказиб бериш ҳажмини 2 миллион тоннагача оширишни режалаштирмоқда. Бу ҳақда «ҚазМунайГаз» Миллий компанияси бошқаруви раисининг ўринбосари Асет Магауов маълум қилди.

Унинг сўзларига кўра, 2024 йилда нефть ташиш ҳажми 83,5 миллион тоннани ташкил этди – бу режадан 8 фоизга ёки 6 миллион тоннага, шунингдек, 2023 йилга нисбатан 4 фоизга кўп.

КТК (Каспий қувурлари консорциуми) нефть қувури орқали 2024 йил якунларига кўра 55,7 миллион тонна нефть жўнатилган. Шу билан бирга, углеводород ресурсларини етказиб беришнинг қўшимча йўналишларини ривожлантириш ва диверсификация қилиш ишлари давом эттирилди.

“2024 йилда «Атирау – Самара» нефть қувури орқали Германияга етказиб бериш ҳажми 50 фоизга оширилди. 2025 йилда бу кўрсаткични 2 миллион тоннага етказиш режалаштирилган”, – деди Асет Магауов «Самруқ-Қазна» АЖ жамоатчилик кенгаши йиғилишида.

Шунингдек, SOCAR билан тузилган келишув доирасида Ақтау-Боку-Жейҳон йўналиши бўйича Қозоғистон нефтини транзит қилиш ҳажми 1,4 миллион тоннагача ёки 27 фоизга оширилган. 2025 йилда денгиз орқали транзит ҳажмини 1,7 миллион тоннага етказиш кўзда тутилмоқда.

2025 йилнинг дастлабки 5 ойи якунларига кўра, нефть ташиш ҳажми 34,7 миллион тоннани ташкил этди, бу режадан 2 фоизга ёки 825 минг тоннага кўп.