Косовонинг амалдаги бош вазири партияси сайловларда етакчилик қилмоқда
ASTANA. Kazinform - Косовонинг амалдаги бош вазири Альбин Курти ўз партияси сайловларда ғалаба қозонганини маълум қилди, дея хабар беради Кazinform агентлиги Euronewsга таяниб.
Марказий сайлов комиссияси маълумотларига кўра, бу сафар сайловчиларнинг фаоллиги нисбатан паст – 40,59%.
Косоводаги парламент сайловларининг дастлабки натижаларига кўра, амалдаги бош вазир Альбин Курти партияси етакчилик қилмоқда, бироқ ҳукуматни мустақил шакллантириш учун зарур бўлган кўпчилик овозга эга эмас.
Овозларнинг 73 фоизи санаб чиққач, сўлчи “Ўз тақдирини ўзи белгилаш” партияси 42 фоизга яқин овоз тўплади.
Бош вазир матбуотга гапирар экан, натижа “яхши бошқарув, илғор ва демократик етакчиликдан далолат” эканини айтди.
— Бизнинг коалициямиз янги ҳукумат тузади ва шу йўл билан биз бошлаган ишни давом эттирамиз, лекин бундан ҳам кўпроқ нарсани қиламиз, — деди Курти журналистларга.
Ўнг марказчи Косово Демократик партияси (КДП) 22,68 фоиз билан иккинчи ўринда, учинчи ўринда Косово Демократик Лигаси (17,9 фоиз).
Бу натижаларга кўра, Курти партияси ҳукуматни мустақил шакллантириш учун етарли ўринга эга эмас. Бу КДП ва КДЛнинг икки партияли коалицияга бирлашиши учун жой қолдиради. Курти аввалроқ мухолифатдаги ҳар қандай партия билан ҳамкорлик қилиш имкониятини рад этган эди.
Молиявий масалалар қолмоқда
Курти вазирлар кабинети Сербия ва минтақадаги этник серблар билан зиддиятга сабаб бўлган қатор қадамлар қўйганидан сўнг Ғарб етакчилари билан келиша олмади. Бу қадамлар қаторига минтақада Сербия валютасидан фойдаланишни тақиқлаш киради. Сербия президенти Александр Вучич Приштина қарорини “қабул қилиб бўлмайдиган” деб атади. Унинг айтишича, динорнинг бекор қилиниши “одамларни тирикчиликдан маҳрум қилади”.
АҚШ, Европа Иттифоқи ва НАТО бошчилигидаги KFOR тинчликпарвар кучлари Приштина ҳукуматини миллатлараро можаро қайта бошланишидан хавфсираб, бир томонлама ҳаракатлардан тийилишга чақирмоқда.
Парламентнинг 120 нафар депутати учун сайловда икки миллионга яқин сайловчилар иштирок этди. Сайлов натижаларидан қатъи назар, Косово парламентидаги 20 ўрин озчиликлар учун, улардан ўнтаси серб озчилик вакиллари учун ажратилган.
Сайловларни 18 мингдан ортиқ кузатувчи, жумладан, Европа Иттифоқидан 100 нафар вакил кузатиб борди.
1,6 миллион аҳолига эга Косово Европанинг энг қашшоқ давлатларидан бири ҳисобланади. Аҳоли жон бошига ЯИМ 6000 евродан кам (2023 йил маълумотлари).
Косово сиёсатчилари давлат хизматчиларининг маоши ва пенсияларини оширишга, таълим ва соғлиқни сақлаш тизимини яхшилашга, қашшоқликка қарши курашга ваъда бермоқда.
