Келгуси йилда Қозоғистонда республика бюджетининг даромади ортади – вазир

ASTANA. Kazinform - Қозоғистон Республикаси Миллий иқтисодиёт вазири Алибек Қуантиров республика бюджетининг даромадлари ва харажатлари бўйича прогнозларни маълум қилди, деб хабар бермоқда Kazinform мухбири.

Эслатиб ўтамиз, Қозоғистон Республикасининг «2023-2025 йилларга мўлжалланган республика бюджети тўғрисида»ги қонуни лойиҳаси парламент мажлисида кўриб чиқилмоқда.

«Республика бюджети ва Миллий жамғарманинг режалаштирилган йилларга мўлжалланган параметрларини шакллантириш жараёнида Давлат раҳбари томонидан иқтисодий ва масъулиятли бюджет сиёсати концепциясини таъминлаш бўйича белгиланган вазифалар бажарилди. 2023-2025 йилларга мўлжалланган республика бюджети параметрлари бюджет сиёсатининг даромадлар базасини тўлдиришнинг янги манбаларини тўплаш ва бюджет харажатларини ижтимоий-иқтисодий ривожлантиришнинг устувор йўналишларига жамлашга йўналтирилганлигини ҳисобга олган ҳолда тузилди»

, — деди вазир.

Унга кўра, 2023 йилда республика бюджети даромадлари жорий йилнинг аниқланган режасига нисбатан 37 фоизга ошади.

Республика буджетига қўшимча даромадлар Ҳукумат томонидан даромадлар базасини кенгайтириш ва солиқ маъмуриятчилигини такомиллаштириш, шунингдек, яширин иқтисодиёт улушини камайтириш бўйича кўрилаётган чора-тадбирлар ҳисобига таъминланади.

«Республика бюджети харажатлари эса 2023 йилдаги 21 триллион тенгедан 2025 йилда 22,7 триллион тенгега босқичма-босқич ўсиши кутилмоқда. Ялпи ички маҳсулотга келсак, 2023 йилдаги 17,4 фоиздан 2024-2025 йилларда 16 фоизга камайиши кутилмоқда»

, — деди вазир.

Бунгача Миллий иқтисодиёт вазири нефт нархи, инфляция, экспорт нархлари ва ялпи ички маҳсулотнинг 2027 йилгача бўлган прогнозларини берган эди.

Муаллиф: Айжан Серикжанқизи