Қасим-Жомарт Тоқаев Доҳа форумининг панель сессиясида иштирок этди

ASTANA. Kazinform – Давлат раҳбари Newsmaker Interview форматидаги махсус сессияда иштирок этди ва модератор, CNN журналисти Жулиа Чаттерлининг саволларига жавоб берди.

Қозоғистон Президенти, биринчи навбатда, БМТнинг самарали фаолияти муҳимлиги ва вақт ўтиши билан ўрта кучларнинг роли ортиб бораётгани ҳақида гапирди.

“БМТ универсал ташкилот сифатида инсоният учун ажралмас ҳисобланади. Чунки унинг ўрнини босадиган ташкилот йўқ. Афсуски, буюк давлатлар дунёда тинчлик ва барқарорликни тўлиқ сақлай олмаяпти. Бугунги вазият кўплаб давлатларни, жумладан, Қозоғистонни ҳам хавотирга солмоқда. Шунинг учун Бирлашган Миллатлар Ташкилотини ислоҳ қилиш керак. Биз йирик давлатлар ўртасида муроса бўлиши керак, деб ҳисоблаймиз. Уларнинг келишувга эриша олмагани сабабли Хавфсизлик Кенгаши боши берк кўчага кириб қолди. Қозоғистон каби ўрта кучлар минтақавий даражада, шунингдек, глобал маконда тинчлик ва хавфсизликни мустаҳкамлашда жуда муҳим рол ўйнаши мумкин”, – деди Қасим-Жомарт Тоқаев.

Давлат раҳбари жаҳон савдосидаги зиддиятлар ҳақида ўз фикрларини билдирди.

“Менимча, савдо можаролари, жумладан, тариф чоралари ҳам энг яхши ечим эмас. Бу жуда шубҳали сиёсат. ЖСТга аъзо давлат сифатида Қозоғистон ушбу муҳим савдо-иқтисодий ташкилотнинг барча норма ва қоидаларига қатъий риоя қилади. Биз тўсиқлар ва можароларни қўллаб-қувватламаймиз. Қозоғистон ҳали бундай қийинчиликларга дуч келмаган. Чунки биз минтақадаги қўшниларимиз ва бошқа давлатлар билан конструктив ва ўзаро манфаатли муносабатларни сақлаб келмоқдамиз. Шу боис минтақамизда бу каби муаммолар юзага келмайди, деб ўйлайман. Айни пайтда биз барча йирик давлатларни бундай босим механизмларидан фойдаланмасликка чақирамиз», – деди Президент.

Қасим-Жомарт Тоқаев Қозоғистон ташқи сиёсати, Украина ва Яқин Шарқдаги вазиятни тартибга солишга оид саволларга жавоб берди. Шунингдек, ёшларнинг мамлакат тараққиётидаги ўрнига алоҳида тўхталиб ўтди.