Канн фестивалида дресс-код қўлланилиши кучайтирилди
ASTANA. Kazinform – Канн кинофестивали иштирокчилари ва меҳмонларининг ташқи кўринишига оид талаблар аниқлаштирилди: энди очиқ кийимларга йўл қўйилмайди, деб хабар беради euronews.com.
78-Канн кинофестивалида машҳур қизил йўлакда фақатгина одоб-ахлоққа мос либосларда пайдо бўлиш мумкин. Бундан буён яққол яланғочликни намоён этувчи ёки кийимсизлик таассуротини уйғотувчи либослар тақиқланади.
Фестиваль сайтида бу чекловлар одоб-ахлоқ нуқтаи назаридан жорий этилгани таъкидланган. Хавфсизлик нуқтаи назаридан эса, меҳмонларга ҳаракатланиш ва жой эгаллашга тўсқинлик қилувчи, масалан, узун, ҳаддан ташқари катта кийим-кечаклардан воз кечиш тавсия қилинган.
Сайтда қуйидаги либос комбинациялари мумкинлиги қайд этилган:
«Кичик қора либос», коктейль кўйлак, тўқ рангли шим-костюм, қора шим билан кийилган зиёли блузка; элегант туфли ёки пошнали/пошнасиз сандаллар (кроссовка эмас); қора ёки тўқ кўк рангли костюм билан бабочка ёки тўқ рангли галстук.
Ўтган йили Канннинг «маликаси» сифатида оммавий ахборот воситалари супермодель Белла Хадидни тилга олган эди — у Saint Laurentнинг шаффоф кўйлагида ҳаммани ҳайратда қолдирган. 2023 йилда эса фестивал юлдузи сифатида шаффоф Gucci либосидаги Ирина Шейк тан олинган. Сўнгги бир неча йил ичида фестивалда очиқ кийимларда Ева Лонгория, Наташа Поли, Жулия Фокс ва бошқа машҳурлар ҳам кўринган.
Канн фестивали ташкилотчилари ҳар йили қоидаларни қайта кўриб чиқишади. Масалан, 2018 йилда қизил йўлакда селфи олиш тақиқланган. Фестиваль директори Тьеррининг айтишича, селфилар юлдузларнинг йўлакдан ўтиши жараёнини секинлаштиради.
Дунё киносида муҳим бўлган ушбу воқеа Франциянинг Лазур соҳилида жойлашган дам олиш шаҳрида 24 майгача давом этади.
