Италияда фирибгарлар вазирнинг "овози билан" бизнесменлардан пул ундирган
ASTANА. Кazinform – Италияда телефон фирибгарлари овозини мудофаа вазирига ўхшатиб, йирик бизнесменлар ва корпорациялар раҳбарларини алдаб, катта миқдорда пул олган, деб хабар беради Euronews.
Мамлакатнинг бир қатор бадавлат кишиларига Гвидо Крозетто ва унинг шериклари қўнғироқ қилиб, Гонконгдаги банк ҳисобига тахминан бир миллион евро ўтказишни сўрашди. Бу пул Яқин Шарқда ўғирлаб кетилган италиялик журналистларни озод қилиш учун тўлаш керак, деган баҳона билан сўралган.
Милан прокуратураси тергов ишларини олиб бормоқда.Крозеттонинг ўзи Х сайтидаги постида "абсурд" деб атаган воқеа сешанба куни бошланган.
- Шахсан танимайдиган таниқли тадбиркор менга мурожаат қилмоқчи эканлигини айтди. Телефон суҳбати чоғида у аввалроқ мен, кейин эса генерал билан боғланганини ва бу “генерал” тақдим этган ҳисоб рақамига жуда катта миқдорда пул ўтказганини айтди, — деб ёзган Крозетто.
Крозетто бу ҳақда полицияга хабар берди ва карабинерлар фирибгарларнинг қурбонига айланган тадбиркорнинг аризасини қабул қилди.
Вазир айтганидек, эртаси куни ҳам худди шундай ҳолат юз берди ва унинг эртасига фирибгарлар ўзларини Гвидо Крозетто деб таништириб, яна икки йирик тадбиркорнинг пулларини олмоқчи бўлишди.
Сохта вазирдан қўнғироқ қабул қилганлар рўйхатида Pirelli раҳбари Марко Тронкетти Провера, йирик инвестор Диего Делла Валле, дизайнер Жоржио Армани, Prada бош директори Патрицио Бертелли, Ray Ban ва Oakley асосчиси Дель Веккьо ва қурилиш магнати Франческо Кальтаджироне оилалари, шунингдек, «Интер»нинг собиқ президенти Массимо Мораттилар бор.
Фирибгарлар телефон қўнғироқлари пайтида сунъий интеллект асосида ишлайдиган овозли фильтрдан фойдаланганми ёки мудофаа вазирининг сохта овози билан аудиохабар ёзиб олганми, ҳозирча номаълум.
Кибержиноятчиларни аниқлаш учун терговчилар фирибгарлар томонидан тақдим этилган банк ҳисоб рақамларига киритилган маблағлар қаерга кетганини аниқлашга ҳаракат қилмоқда.
Эслатиб ўтамиз, Италия аэропортида Европадаги энг йирик қуёш электр станцияси ўрнатилгани ҳақида хабар берган эдик.
