Исроил БМТ Инсон ҳуқуқлари кенгашидан чиқишини эълон қилди

ASTANA. Kazinform - Исроил ташқи ишлар вазири АҚШнинг БМТ Инсон ҳуқуқлари кенгаши таркибидан чиқиши ҳақидаги қарорини олқишлади ва унинг мамлакати ҳам шундай қилиш ниятида эканини айтди, деб хабар беради Кazinform агентлиги DWга таяниб.

АҚШдан кейин Исроил БМТ Инсон ҳуқуқлари кенгаши ишида иштирок этишни тўхтатишини эълон қилди. Бу ҳақда мамлакат ташқи ишлар вазири Гидеон Саар 5 февраль, чоршанба куни Х ижтимоий тармоғидаги аккаунтида ёзди.

— Исроил президент Трампнинг БМТ Инсон ҳуқуқлари кенгашида иштирок этмаслик қарорини олқишлайди. Исроил Қўшма Штатларга қўшилади ва БМТ Инсон ҳуқуқлари кенгаши ишида қатнашмайди, — деди вазир баёнотида.

Саар БМТ Инсон ҳуқуқлари кенгашини "анъанавий тарзда инсон ҳуқуқларини бузувчиларни ҳимоя қилишда" ва "Яқин Шарқдаги ягона демократия - Исроилни обсессив тарзда демонизация қилишда" айблади.

—Бу орган асосий эътиборни инсон ҳуқуқларини тарғиб қилиш ўрнига демократик мамлакатга ҳужум қилиш ва антисемитизмни тарғиб қилишга қаратган, — дея қўшимча қилди сиёсатчи.

Исроил ташқи ишлар вазири, шунингдек, унинг мамлакатига қарши юздан ортиқ қораловчи резолюция қабул қилинганини эслатиб ўтди, “бу Кенгашда ҳозиргача қабул қилинган барча резолюцияларнинг 20 фоизидан кўпроғини ташкил этади – Эрон, Куба, Шимолий Корея ва Венесуэлага нисбатан кўпроқдир”.

Эслатиб ўтамиз, АҚШ Жаҳон соғлиқни сақлаш ташкилотидан чиқди.