Малайзия Қозоғистонда электромобиль ишлаб чиқаришни режалаштирмоқда
ASTANA. Kazinform — Олжас Бектенов Proton Holdings раҳбари Чунронг Ли билан Қозоғистонда электромобиль ишлаб чиқариш режасини муҳокама қилди. Бу ҳақда Ҳукумат матбуот хизмати хабар берди.
Қозоғистон Республикаси Бош вазири Олжас Бектенов Малайзиянинг Proton Holdings Berhad компанияси бош директори Чунронг Ли билан учрашув ўтказди. Автомобилсозлик соҳасидаги ҳамкорлик масалалари, жумладан, Қозоғистонда янги ишлаб чиқариш қувватини очиш истиқболлари муҳокама қилинди.
Томонлар Proton Holdingsнинг Қозоғистонда электромобиль ишлаб чиқариш режаларини муҳокама қилди. Компания - автомобилсозлик соҳасида Малайзия бозорида етакчи ҳисобланади. Proton автомобиллари, жумладан ички ёнув двигателли моделлар ва электромобиллар 26 дан ортиқ мамлакатларга экспорт қилинади. Шунингдек ишлаб чиқарувчи трансмиссия ва транспорт воситаларини ишлаб чиқиш, лойиҳалаш ва муҳандислик тадқиқотлари марказига эга.
Олжас Бектенов Қозоғистон Республикаси Президенти томонидан ишлаб чиқаришни маҳаллийлаштириш ва янги иш ўринлари яратиш, замонавий технологияларни жорий этиш орқали машинасозлик саноатини ривожлантириш вазифаси қўйилганини таъкидлади. Қозоғистон иқтисодиётининг диверсификацияси ва барқарор ўсиши учун сармояларни жалб этиш ва янги ишлаб чиқариш қувватларини очиш муҳим аҳамиятга эга. Жорий йилнинг биринчи чорагида мазкур соҳага 55 миллиард тенге сармоя жалб этилди. 2024 йилда инвестициялар ҳажми икки баробарга ошиб, 282 миллиард тенгега етди.
Йиғилишда Ҳукумат лойиҳани амалга оширишни ҳар томонлама қўллаб-қувватлашга тайёрлиги қайд этилди. Илмий-тадқиқот ва тажриба-конструкторлик ишлари соҳасида ҳамкорлик ва тажриба алмашиш мамлакатимизнинг илмий-техник салоҳиятини ривожлантиришда катта истиқболга эга.
Proton Holdings бош директори Чунронг Ли инвесторлар учун яратилган шароитлар жозибадорлиги туфайли Қозоғистон бозорига киришга қизиқиш билдирди.
Учрашув якунида томонлар лойиҳани амалга ошириш учун ўзаро манфаатли ҳамкорликни ривожлантириш ниятида эканликларини билдирдилар. Саноат ва қурилиш вазирлигига тегишли “Йўл харитаси”ни ишлаб чиқиш топширилди.
