Хорижлик блогерлар Бутунжаҳон кўчманчилар ўйинлари спорт турлари билан танишди
ASTANА. Кazinform - Бугун «Qazaqstan» енгил атлетика мажмуасида V Бутунжаҳон кўчманчилар ўйинларига тайёргарлик кўриш ва ўтказиш дирекцияси мутахассислари хорижлик блогерларга ички туризмни ривожлантириш истиқболлари ва тақдимоти ҳамда миллий спорт турлари элементларини намойиш этди.
Тадбирда Таиланд, Малайзия, Хитой, Уммон, Туркия, Озарбайжон, Вьетнам, Италия ва Қирғизистон каби 8 та давлатдан 11 нафар хорижий блогер иштирок этди. Шу билан бирга, маърифий анжуманга Қозоғистон Республикаси Ташқи ишлар вазирлиги ҳам ёрдам қилганини таъкидлаш лозим. Иштирокчилар орасида малайзиялик Nur Ruhainies Farehah, Instagramда 1,7 миллион ва TikTokда 738,7 минг обуначиси бўлган актриса ва бошловчи, хитойлик Wang Jianing, Xiaohongshu, Douyin ва Weiboда кўплаб мухлислари бор фуд-блогерлар бор эди.
Тадбир доирасида хорижлик блогерлар спортнинг қозоқ кураши, бургут билан ов қилиш, ошиқ отиш, тўғизқумалоқ, мангала, овари, мас-рестлинг, камондан отиш каби турлари билан яқиндан танишдилар.
– Мазкур тадбир миллионлаб хорижий блогерлар аудиториясига мамлакатимизнинг ижобий қиёфаси, сайёҳлик салоҳияти ва Бутунжаҳон кўчманчилар ўйинларини тарғиб қилиш имконини беради, – дейди Маданий ва илмий тадбирларни, «Бірлік керуені» ва «Этноауыл» лойиҳаларини мувофиқлаштириш бўлимии бош мутахассиси Арайлым Зият.
Туркиялик блогер Кемал Кая ҳар қандай спорт мусобақаси кўплаб мамлакатлар аҳолисини яқинлаштиришини таъкидлади.
“Бутунжаҳон кўчманчилар ўйинларининг Астанада ўтказилиши тўғри қарордир. Йилдан-йилга чирой очиб бораётган гўзал шаҳарда мусобақада қатнашиш шарафдир. Шу билан бирга, Қозоғистон мусобақани юқори савияда ўтказишига ишончим комил”, — деди у.
Эслатиб ўтамиз, 8-13 сентябрь кунлари Астана шаҳрида V Бутунжаҳон кўчманчилар ўйинлари бўлиб ўтади. Мазкур мусобақада 89 давлатдан 2000 дан ортиқ спортчи иштирок этиши кутилмоқда. Бутунжаҳон кўчманчилар ўйинларида 21 спорт тури бўйича жами 97 та медаллар жамланмаси ўйналади.
