Германиялик эр-хотин йўқолган мушугини қидиришга 22 минг доллар сарфлади
ASTANA. Kazinform — Германиялик эр-хотин Рафал ва Моника Клайншмит ўзларининг йўқолиб қолган мушугини қидиришга 22 минг доллардан ортиқ пул сарфлади, деб ёзади The Times.
Қайд этилишича, Неро лақабли мушук 2024 йилнинг июлида, Рафал ва Моника дам олишга кетишни режалаштираётганида уйдан қочиб кетган.
— Рафиқам билан таътилни Кимгауда ўтказмоқчи эдим. У ўша ердаги реабилитация марказида эди. Мен Эрлангендаги меҳмонхонага тўхтадим. Кейин эса Неро ўзининг транспорт қутисидан сакраб тушиб, қочиб кетди, — дейди эркак.
Шундан сўнг эр-хотин мушукни топиш учун қўлларидан келган барча ишни амалга оширган. Хусусан, улар ҳар дам олиш кунлари 450 километр йўл босиб, мушукнинг расми туширилган плакатларни илиб чиқади ва Неронинг эътиборини тортиш учун у яхши кўрган тунец балиғини харид қилади.
Таъкидланишича, уй ҳайвонини қидириш жараёнида эр-хотин бензин, меҳмонхоналарда яшаш, махсус камера ва овқатлар харид қилишга умумий ҳисобда 22 минг доллар сарфлаган.
Қидирув ишлари натижа бермаётганига қарамай, Рафал ва Моника умидларини йўқотмаган. Бунинг устига мушук чипланган, шу боис волонтёр ёки шунчаки бефарқ бўлмаган одамлар ёрдамида унинг қаерда экани исталган вақтда маълум бўлиб қолиши мумкин.
— У мен учун муҳим аҳамиятга эга. У оиламиз дўсти ва аъзоси. Ва сен дўстларингни ташлаб кетмайсан. Мен таслим бўлмайман. Мен унинг ҳали ҳам тириклигига ишонаман, — дейди Рафал.
Эслатиб ўтамиз, аввалроқ Германия бошпана изловчилар учун чегараларини ёпиши ҳақида хабар берган эдик.
