Франциядаги йирик автотураргоҳлар қуёш панеллари билан жиҳозланади
Ўтган ҳафта парламент аъзолари муқобил энергия манбаларига ўтишни тезлаштиришга қаратилган қонунни кўриб чиқдилар. Қонун лойиҳасининг алоҳида банди мамлакатдаги камида 80 та автомобилга мўлжалланган барча автотураргоҳлар қуёш батареялари билан жиҳозланган (қопланган) бўлишини талаб қилади.
Янги ёндашувлар Франция Президенти Макроннинг қайта тикланадиган энергияга сармоя киритиш режасининг бир қисми бўлиб, мамлакатда ишлаб чиқарилган қуёш энергиясини 10 баравар ошириш ва қуруқликдаги шамол станциялари қувватини икки баравар оширишни мақсад қилган.
2023 йил 1 июлдан бошлаб 80 дан 400 гача бўлган кичик автотураргоҳларда қуёш панеллари бўйича янги талабларни амалга ошириш учун беш йил вақт берилади. 400 дан ортиқ жойларга эга йирик автотураргоҳлар қисқароқ «ўтиш» даврига эга: бинолар уч йил ичида янги қоидаларга мувофиқлаштирилиши, тўхташ жойининг камида ярми қуёш панеллари билан қопланиши керак.
Франция ҳукуматига кўра, савдо марказлари ва вокзаллар атрофидаги катта автотураргоҳларни кўзда тутувчи режа 11 гигаваттгача қувват ишлаб чиқариши мумкин, бу эса маҳаллаларни энергия билан таъминлайдиган бир нечта ядровий реакторларга тенг.
Муаллиф: Арнур Рахимбеков
Фото: publicsenat
