FAO Қозоғистон билан ҳамкорликни яна 10 йилга узайтиради
ASTANA. Kazinform — БМТнинг Озиқ-овқат ва қишлоқ хўжалиги ташкилоти Қозоғистон билан ҳамкорликни яна 10 йилга узайтиради. Бу ҳақда Астана халқаро форумида FAO бош директори Цюй Дунъюй айтиб ўтди.
Цюй Дунъюй Қозоғистоннинг минтақадаги агро-озиқ-овқат тизимини ўзгартиришга қўшган ҳиссасини юқори баҳолади ва республика билан ҳамкорлик дастурини яна 10 йилга узайтиришга тайёрлигини билдирди.
“Қозоғистон билан 10 йиллик дастуримиз ўз самарасини бермоқда. Шунинг учун биз бу ҳамкорликни яна 10 йилга узайтиришга тайёрмиз. FAOнинг 100 йиллигини нишонлар эканмиз, биз қўл қовуштириб ўтирмай, ҳаракат қилдик, — деб фахр билан айта оламиз. Бизга алоҳида ҳамкорлик, максимал самарадорлик ва аниқлик керак. Бу йил 16 октябрда иккинчи жаҳон урушидан кейин ташкил топган ташкилотимизнинг 80 йиллигини нишонлаш учун йиғиламиз”, - деди у.
Шунингдек, у Марказий Осиёнинг глобал жараёнлардаги ўрнига тўхталиб ўтди. Унинг фикрича, Марказий Осиё географик, иқтисодий ва иқлимий нуқтаи назардан муҳим чорраҳа ҳисобланади.
“Қозоғистон ҳудуди бўйича Марказий Осиёдаги энг йирик давлатдир. Президент жанобининг мамлакатни минтақавий ва жаҳон миқёсида озиқ-овқат хаби сифатида намоён этиш ғояси республика минтақавий даражада катта ҳиссага эга эканини кўрсатади", – деди нуфузли меҳмон.
Эслатиб ўтамиз, Астанада Давлат раҳбари Қасим-Жомарт Тоқаев иштирокида Астана халқаро форуми бўлиб ўтмоқда. Форумда қатнашиш учун 7000 дан ортиқ иштирокчи рўйхатдан ўтган. БМТ, ЖССТ, ХМТ ва ЖИМТ каби етакчи халқаро ташкилотлар вакилларига Европа, Марказий Осиё, Яқин Шарқ ва Африкадан 160 дан ортиқ маърузачилар таклиф этилган.
