Европа Иттифоқи Ўрта коридор салоҳиятига қизиқиш билдирмоқда – ўзбекистонлик эксперт
ТASHKENT. Кazinform — Европа Иттифоқи давлатлари Марказий Осиё билан алоқаларни мустаҳкамлаш учун Ўрта коридор салоҳиятига қизиқиш билдирмоқда. Бу ҳақда Ўзбекистон Фанлар академияси Давлат ва ҳуқуқ институти катта илмий ходими Равшан Назаров бўлажак “Марказий Осиё – Европа Иттифоқи” саммитини шарҳлар экан, маълум қилди, деб хабар беради Kazinform мухбири.
— Марказий Осиё давлатлари шу кунгача икки томонлама муносабатлар асосида Европа Иттифоқи билан ҳамкорликни олға сурмоқда. Режалаштирилган учрашув формати бошқача. Европа Иттифоқининг аниқ режаси бор. Хусусан, Еврозона давлатлари Марказий Осиёнинг транспорт-логистика инфратузилмасини ривожлантиришдан, шунга мос равишда унга қўшилишдан манфаатдор. Жумладан, Европа Ўрта коридор салоҳиятига қизиқиш билдирмоқда, – деди Равшан Назаров.
Мутахассиснинг фикрича, бу имкониятдан оқилона фойдаланиш керак. Яъни, Транскаспий транспорт йўлагини ривожлантириш бўйича лойиҳаларга сармоя жалб этиш муҳим. Шунга кўра, Ўрта коридор орқали Марказий Осиёнинг экспорт салоҳияти ортади.
Равшан Назаров, шунингдек, минтақадаги сув танқислиги муаммосини ҳал қилишда Европа Иттифоқи давлатларини қўшма лойиҳаларга жалб этиш ва уларнинг тажрибасидан фойдаланиш мақсадга мувофиқлигини таъкидлади.
— Европа Иттифоқи таклифларидан бири яшил энергия манбаларини ривожлантиришдир. Бу глобал тенденция. Шу муносабат билан Европа Иттифоқи Марказий Осиё мамлакатларига қуёш, шамол ва гидроэнергетикадан ишлаб чиқариладиган энергия улушини ошириш учун сармоя киритиш тарафдори. Бундан ташқари, Ўзбекистон, Қозоғистон ва Туркманистонда сув танқислиги муаммоси долзарбдир. Шу боис сувни тежовчи технологияларни жорий этиш, сув ресурсларини бошқариш тизимини такомиллаштириш зарур. Европа Иттифоқи мамлакатлари бу борада катта тажрибага эга. Шунга кўра, қўшма лойиҳаларни амалга ошириш орқали озиқ-овқат тақчиллиги муаммосини ҳал қилиш мумкин. Нуфузли экспертлар бу борадаги шерикликни ҳамкорликнинг муҳим йўналиши деб билишади, — дея хулоса қилди Равшан Назаров Кazinform мухбирининг саволига жавоб берар экан.
Айтиш жоизки, Европа Иттифоқи Марказий Осиёнинг учта асосий ташқи савдо ҳамкорларидан биридир. Бундан ташқари, минтақа мамлакатларига йўналтирилган барча сармояларнинг 40 фоиздан ортиғи Европа Иттифоқига аъзо давлатлар ҳиссасига тўғри келади.
Эслатиб ўтамиз, 3-4 апрель кунлари Ўзбекистоннинг Самарқанд шаҳрида “Марказий Осиё – Европа Иттифоқи” саммити бўлиб ўтади. Унда Европа кенгаши раиси Антониу Кошта, Еврокомиссия раиси Урсула фон дер Ляйен, Марказий Осиё давлатлари давлат раҳбарлари иштирок этади.
66 ёшли ўзбекистонлик велоспортчи халқаро веломарафон доирасида Қизилўрдага етиб келди.
Муаллиф: Алихан Асқар
