Эрон санкциялар қайтарилиши механизми фаоллаштирилса, “қатъий жавоб” ваъда қилди

ASTANA. Kazinform – Теҳрон уруш чиққани тақдирда минтақадаги барча давлатлар жабр кўришини айтди.

Эрон ташқи ишлар вазири Аббос Аракчи БМТ томонидан Эронга нисбатан санкцияларни тиклаш учун «snapback» механизмини ишга тушириш уринишига «қатъий» жавоб берилишини маълум қилди. Бу ҳақда у якшанба куни миллий хавфсизлик ва ташқи сиёсат бўйича парламент комиссиясига ҳисобот бериши чоғида айтди, деб хабар қилади IRNA агентлиги.

Комиссия матбуот котиби Эброҳим Резоийнинг сўзларига кўра, Аракчи Теҳрон ҳали ҳам дипломатияга содиқ эканини, аммо босимларга тоқат қилмаслигини таъкидлаган.

“Эрон ҳеч қачон музокаралар столини тарк этмаган ва дипломатияни афзал кўради, аммо санкциялар қайтарилиши механизмининг ишга туширилишига қаттиқ жавоб беради”, — деб келтиради унинг сўзларини IRNA.

Аракчининг таъкидлашича, Оман воситачилигида АҚШ билан олиб борилаётган музокаралар фақат ядровий масалаларга тааллуқли. Диалог қайта бошланганидан бери у АҚШнинг Яқин Шарқ бўйича махсус вакили Стив Уиткофф билан беш марта музокара ўтказган — уч марта Масқатда ва икки марта Римда.

Резоийнинг маълум қилишича, вазир шунингдек, Исроил Эронда уранни бойитишга тўлиқ тақиқ қўйилишини талаб қилаётган ягона давлат эканини айтган. Шу билан бирга, Аракчи минтақавий уран бойитиш марказини яратиш имконини истисно қилмаган, аммо мамлакат ичида бундай жараённи тўхтатишни рад этган.

У шунингдек, «агар уруш бошланса, минтақадаги барча давлатлар жабр кўради», деб огоҳлантирган.

Резоий таъкидлаганидек, айрим Эрон парламенти депутатлари АҚШ билан олиб борилаётган музокараларга нисбатан шубҳа билан қарай бошлаган, чунки Вашингтон музокараларга қарамасдан санкцияларни сақлаб қолмоқда ва янги чекловлар жорий қилмоқда.