ЕИ АҚШга нисбатан божлар жорий этишни 1 августга қолдирди

ASTANA. Kazinform – Европа Иттифоқи АҚШдан келаётган товарларга божлар жорий этишни 1 августгача қолдирди. Бу ҳақда Европа Комиссияси раҳбари Урсула фон дер Ляйен маълум қилди, деб ёзади DW.

Европа Комиссияси аввалроқ АҚШ билан божхона низоси юзасидан жавоб чораларини 14 июль куни қабул қилишни режалаштирган эди. Бироқ Reuters агентлиги хабарига кўра, бу чоралар август бошига қолдирилди.

Сиёсатчи бу қарорини Дональд Трамп бошчилигидаги АҚШ маъмурияти билан келишув имкониятини ўрганиш истаги билан изоҳлади. Аввалроқ Трамп 1 августдан Европа Иттифоқидан келадиган товарларга 30 фоизлик бож жорий этишини айтган эди.

Вашингтон бундан аввал ҳам айрим божларни, жумладан, европа маҳсулотларига ҳам, оширганди. Шу муносабат билан Европа Иттифоқи 14 июль куни жавоб чораларини жорий этишни режалаштирган. Аммо Reuters манбаларига кўра, Германия ҳукумати ва бошқа айрим давлатлар бу қарор музокараларга салбий таъсир қилишидан хавотирда эканлиги учун уни кечиктиришни таклиф этган.

Кеча Урсула фон дер Ляйен Трампнинг 30 фоизлик божи “муҳим трансатлантик таъминот занжирларини бузиши, ҳар икки томондаги бизнес, истеъмолчилар ва беморларга зарар келтириши” мумкинлигини айтди. У Брюссельнинг 1 августгача келишувга эришиш учун ҳаракатларни давом эттиришга тайёр эканини таъкидлади.

«Шу билан бирга, агар зарур бўлса, ЕИ манфаатларини ҳимоя қилиш учун барча зарур чораларни кўрамиз, жумладан, тенг жавоб чораларини қўллаймиз», — деди фон дер Ляйен.

Европа Кенгаши раиси Антониу Кошта ҳам Европа Иттифоқи “яхлит” эканини ва ўз манфаатларини ҳимоя қилишга “тайёр” эканини билдирди.

«Божлар – бу солиқлар. Улар инфляцияни кучайтиради, ноаниқлик яратади ва иқтисодий ўсишга тўсқинлик қилади. Биз бутун дунё бўйлаб ишончли савдо ҳамкорликларини ривожлантиришни давом эттирамиз», — деди у.

Франция президенти Эммануэль Макрон ҳам Трамп божларига қарши жавоб чораларини ишлаб чиқишга чақирди. У Париж фон дер Ляйеннинг бу ташаббусга “қатъий қарши эканини” қўллаб-қувватлашини билдирди. Макрон Европа Комиссиясининг музокаралар олиб бориш ниятини маъқуллаб, 1 августга қадар ўзаро манфаатли келишувга эришиш учун жараённи тезлаштириш лозимлигини айтди. Шунингдек, агар келишувга эришилмаса, Комиссия ўз ихтиёридаги барча воситаларни, жумладан, мажбурий чораларни ҳам ишга солишга тайёрланиши кераклигини таъкидлади.