Дунё бўйича вабодан ўлим кўрсаткичи 32 фоизга ошди – ЖССТ

Жаҳон соғлиқни сақлаш ташкилоти баёнотига кўра, шу йилнинг 1 январидан 23 февралига қадар 23 давлатда қарийб 70,5 мингта вабога чалиниш ҳолати қайд этилган. Беморлардан 808 нафари ҳаётдан кўз юмган.

Гарчи, февраль ойига келиб, касалланиш кўрсаткичлари аввалги ойга нисбатан 14 фоизга камайган бўлса-да, ўлим даражаси бу даврда 32 фоизга ошган.

Мутахассисларнинг фикрича, мазкур эпидемия авж олишига табиий офатлар, иқлим ўзгариши, айниқса, сув тошқинидан зарар кўрган ҳудудларда инфратузилма ёмонлиги ҳамда тиббий хизматлардан фойдаланиш чеклангани каби трансчегаравий омиллар сабаб бўлмоқда.

ЖССТ ҳисоботида февраль ойида вабога қарши вакциналар ишлаб чиқариш суръати ошгани қайд этилади. Бироқ бу ҳозирча глобал эҳтиёжларни тўлиқ таъминлаш учун етарли эмас.

Қолаверса, тоза ичимлик суви таъминоти, санитария ва гигиена қоидаларига амал қилиш вабо эпидемиясини тўхтатишнинг узоқ муддатга мўлжалланган ягона барқарор ечими бўлиб қолмоқда.

ССВ матбуот хизматига кўра, вабо ингичка ичакнинг зарарланиши, интоксикация, умумий аҳвол оғирлашуви ва организм сувсизланиши билан кечадиган ўта хавфли ўткир инфекцион касаллик ҳисобланади.

Маълумот учун, 1816 йилда инсоният даҳшатли пандемияни бошдан кечирган. Бу миллионлаб одамларнинг қирилиб кетишига сабаб бўлган ўта юқумли касаллик вабо эди. Инсоният мазкур ўлат-пандемия билан етти марта тўқнаш келган ва касаллик сабаб 1923 йилгача ер аҳолисининг 140 миллиондан ортиғи ҳаётдан кўз юмган.

Тиббиёт фанлари доктори Жуманазар Бекназаров бу касаллик учраган пайтлар қон томирига физиологик суюқлик қуйиб даволашнинг иложи бўлмаганини, бемор қанча суюқлик ичмасин, у қонга сўрилмай ташқарига чиқиб кетаверганини, натижада, қон қуюқлашиб ҳаётий муҳим аъзоларни кислород билан таъминлай олмай қолгани сабабли ўлим содир бўлганини айтади.