Давлат раҳбари “Қозоғистон халқига” жамғармаси раиси Болат Жамишевни қабул қилди
ASTANА. Кazinform — Президент Қасим-Жомарт Тоқаевга жамғарманинг бугунги кундаги фаолияти ва келгуси даврдаги вазифалари ҳақида ахборот берилди.
Болат Жамишевнинг сўзларига кўра, “Қозоғистон халқига” жамғармаси уч йил ичида жами 230 миллиард тенгелик 103 та хайрия лойиҳасини молиялаштирган. Шундан 58 таси тўлиқ амалга оширилди. Жамғарма фаолияти шаффофлик, ҳисобдорлик ва барқарорлик тамойилларига асосланади. 2023 йил якунлари бўйича Ernst&Young компанияси ташқи аудит ўтказди.
Давлат раҳбарига жамғарма томонидан соғлиқни сақлаш, хусусан, оғир ва кам учрайдиган касалликларга чалинган беморларни дори-дармон билан таъминлашга алоҳида эътибор қаратилаётгани ҳақида ахборот берилди. Шу мақсадда 461 нафар фуқарога, жумладан, 342 нафар болаларга 57,7 миллиард тенге ажратилди. Саратон касаллигига чалинган 1200 дан ортиқ киши 14,5 миллиард тенгелик махсус дори-дармонлар билан таъминланди. Болаларга хизмат кўрсатувчи бешта онкология маркази ва 22 нейрохирургия бўлимига замонавий жиҳозлар харид қилинди. Болалар ногиронлигининг олдини олиш учун 13 та эрта аралашув марказларини очиш режалаштирилган эди. Бугунги кунда шу мақсадда 10 та объект хизмат кўрсатишни бошлади.
Ижтимоий қўллаб-қувватлаш соҳасида 7 та аутизм белгилари бўлган болалар учун марказлар, шунингдек, ҳудудларда 6 та реабилитация маркази фойдаланишга топширилди. Яқин кунларда яна 20 та марказ ишга тушади. 150 нафар фуқаро инновацион протезлар билан таъминланди.
Таянч мактаблар салоҳиятини ривожлантириш лойиҳаси доирасида 135 та қишлоқ мактаби модернизация қилинди. Алмати вилоятидаги 50 та мактаб ва Қарағанди вилоятидаги 86 та ўқув даргоҳида физика, кимё, биология каби фанлар учун замонавий кабинетлар жиҳозланди. 3000 дан ортиқ талаба жамғарманинг таълим грантига сазовор бўлди. Ақтўбе вилоятида 134 та кичик мактабнинг моддий-техник базаси янгиланиб, рақамли технологиялардан фойдаланган ҳолда ўқитишнинг тўртта модели жорий этилди.
Маданият ва спорт соҳасида Ғарбий Қозоғистон вилояти кутубхоналарини комьюнити марказ сифатида қайта қуриш, 13 та модулли спорт зали қуриш ишлари йўлга қўйилди. Аҳоли пунктларида 100 та болалар спорт зали жиҳозланди.
Болат Жамишевнинг сўзларига кўра, жамғарма томонидан сув тошқинларидан жабрланганларга ёрдам кўрсатилиб, бешта вилоятда 627 та уй-жой қурилиши молиялаштирилди.
“Кичик шаҳарлар – катта имкониятлар” ижтимоий ташаббуси доирасида йирик корхоналар ва тадбиркорлик субъектларини кўмагида моношаҳарлар инфратузилмасини яхшилаш дастурини ишлаб чиқиш режалаштирилган.
Қасим-Жомарт Тоқаев “Қозоғистон халқига” жамғармаси фаолиятини юқори баҳолаб, Қозоғистонда фуқаролик жамияти ва ижтимоий барқарорликни мустаҳкамлашда хайрия тадбирлари муҳимлигини таъкидлади.
