Чжан Сяо: Қозоғистон бозорига йирик хитойлик инвесторларнинг қизиқиши ортиб бормоқда
ASTANА. Кazinform - Олжас Бектенов Хитойнинг Қозоғистондаги Элчиси Чжан Сяо билан савдо айланмасини ошириш бўйича қўшма иш натижаларини муҳокама қилди, дея хабар беради Ҳукумат матбуот хизмати.
Қозоғистон Бош вазири Олжас Бектенов Хитой Халқ Республикасининг Қозоғистондаги Фавқулодда ва Мухтор Элчиси Чжан Сяо билан икки томонлама савдо-иқтисодий ва маданий-гуманитар ҳамкорликни ошириш бўйича қўшма иш натижаларини муҳокама қилди. Учрашув Чжан Сяонинг Хитой Халқ Республикасининг Қозоғистондаги Элчиси сифатидаги дипломатик миссияси якунланишига тўғри келди.
Олжас Бектенов икки давлат раҳбарлари томонидан белгиланган мақсадларга эришиш борасидаги бунёдкорлик ишларини қайд этди. Кейинги йилларда икки томонлама иқтисодий алоқаларни мустаҳкамлаш борасида сезиларли ютуқларга эришилди. Ўзаро ҳамкорликни янги босқичга кўтариш товар айирбошлаш ҳажмини ошириш, экспортни кенгайтириш ва сармояларни жалб этишга хизмат қилмоқда. Хитой Қозоғистоннинг энг йирик савдо шериги бўлиб қолмоқда. Транскаспий мультимодал коридори бўйлаб ташиладиган юклар оқимини кўпайтириш ҳамкорлик салоҳиятини очиш учун истиқболли восита бўлади.
Ўз навбатида, Чжан Сяо йил бошидан буён мамлакатлар ўртасидаги товар айирбошлаш ҳажми 12 фоизга ўсиб, 36,5 миллиард долларни ташкил этганини маълум қилди. Шунингдек, Хитой Элчиси йирик хитойлик инвесторларнинг Қозоғистон бозорига қизиқиши ортиб бораётгани, бу қулай бизнес муҳитидан далолат беришини айтди.
Суҳбат якунларига кўра, томонлар ҳар томонлама савдо-иқтисодий шерикликни янада мустаҳкамлаш муҳимлигини таъкидладилар.
Бундан олдин Олжас Бектенов Kazakh Invest директорлар кенгаши йиғилишини ўтказгани хабар қилинганди.
