Бугунги кунда Қозоғистон денгизга чиқиш имконияти йўқ мамлакатлар қаторига кирмайди – БМТ Бош котиби
ALMATY. Kazinform – Антониу Гутерриш барча қатнашчиларга самимий миннатдорлик билдириб, ушбу Марказнинг очилиши минтақа учун Барқарор ривожланиш мақсадларига эришиш йўлида янги даврни бошлаб берганини таъкидлади.
“Бу умумий устувор йўналишлар ва ҳамкорликда қабул қилинган ечимларга асосланган Марказий Осиёдаги янги ҳамжиҳатлик даврини англатади. Марказ минтақа етакчилари ўртасидаги мустаҳкам алоқаларни чуқур иқтисодий интеграцияга олиб бориши мумкинлигини кўрсатадиган салоҳиятга эга. Президент Тоқаевнинг оқилона сиёсатини ва етакчилигини юксак баҳолайман. Унинг ташаббуслари халқаро тартиботда роли ортиб бораётган Марказий Осиёнинг янги қиёфасини шакллантиришга ҳисса қўшмоқда”, – деди Бош котиб.
Антониу Гутерриш шунингдек, Туркманистонда бўлиб ўтадиган денгизга чиқиш имконияти йўқ ривожланаётган мамлакатлар учун БМТнинг учинчи конференцияси арафасида Алматига ташриф буюрганидан мамнунлигини билдирди.
“Ушбу Марказ шундай мамлакатлар учун ҳаракат дастурини амалга оширишда инновацион ёндашувларни таклиф эта олади. Бугунги кунда Қозоғистон денгизга чиқиш имконияти йўқ мамлакатлар қаторига кирмайди, деб ишонч билан айта оламиз. Автомобиль ва темир йўл йўлаклари, шунингдек, толали-оптик алоқалар орқали Қозоғистон глобал савдо тизими, халқаро логистика, транспорт ва телекоммуникация марказига айланди. Мамлакатингиз ҳақиқатан ҳам Шарқ ва Ғарб, Шимол ва Жануб ўртасида кўприк бўлиб турибди”, – деди Антониу Гутерриш.
Бош котиб нутқи якунида Қозоғистоннинг ички сиёсий йўналиши ва ташқи сиёсатини юксак баҳолади.
“Қозоғистонга чин қалбимдан қойилман. Мен учун бу мамлакат ақл-заковат рамзи, халқлар ўртасида кўприк бўлувчи ва тинчликка чақирувчи давлатдир. Бу – турли миллат ва дин вакиллари жам бўлиб, умумий келажак сари бирга интиладиган юрт. Қозоғистоннинг ядровий қуролдан воз кечганини ҳеч қачон унутмайман. Ана шу қарор туфайли мамлакатингиз тинчлик ва қуралсизланиш рамзига айланди. Бугунги дунёда бу ғоят долзарб масала. Қозоғистон доим ақл ва масъулият кўрсатиб келган, ва шундай бўлиб қолади. Афсуски, бугунги мураккаб дунёда бундай сабр-тоқат ва донолик етишмаяпти”, – деди Антониу Гутерриш.
