БМТнинг денгизга чиқа олмайдиган ривожланаётган давлатлар бўйича конференцияси Туркманистонда бўлиб ўтади
ASHGABAT. Кazinform – Туркманистон ташқи ишлар вазири Рашид Мередов БМТ Бош котиби ўринбосари Рабаб Фотима билан учрашди, дея хабар беради Кazinform мухбири.
Музокаралар чоғида Рашид Мередов Туркманистоннинг БМТ билан стратегик ҳамкорликни мустаҳкамлаш ниятини билдирди. Бундан ташқари, томонлар жорий йилда Ашхободда бўлиб ўтадиган БМТнинг денгизга чиқа олмайдиган ривожланаётган давлатлар бўйича конференциясини юқори савияда ташкил этиш масаласини муҳокама қилдилар.
— Томонлар ушбу тадбирнинг жаҳон миқёсидаги аҳамиятини алоҳида таъкидладилар. Конференция жорий йилнинг иккинчи ярмида бўлиб ўтади. Унинг доирасида бир қатор муҳим ҳужжатларни қабул қилиш режалаштирилган, — дейилади вазирлик хабарида.
Таъкидлаш жоизки, конференцияда денгизга чиқа олмайдиган 32 та ривожланаётган давлат, жумладан, Марказий Осиё давлатлари вакиллари иштирок этади. Тадбир ҳар 10 йилда бир марта ўтказилади.
Биринчи конференция 2003 йилда Алматида ташкил этилган. Бундан ташқари, Қозоғистон 2020-2021 йилларда денгизга чиқа олмайдиган ривожланаётган давлатлар гуруҳига раислик қилди.
Эслатиб ўтамиз, аввалроқ Қозоғистон ва Туркманистон ўртасидаги товар айирбошлаш ҳажми 1 миллиард долларга ошиши ҳақида ёзган эдик.
Муаллиф: Алихан Асқар
